បាក់រណ្ដៅដីជីកត្បូងសង្កត់កម្មករម្នាក់បានស្លាប់

បុរសជនជាតិទំពួនម្នាក់ចុះជីកត្បូងដែលមានជម្រៅជ្រៅ ជាអកុសលរណ្តៅដីបាក់ធ្លាក់សង្កត់ពីលើរើពុំរួចថប់ដង្ហើមបណ្តាលឲ្យស្លាប់បាត់បង់ជីវិត។

ហេតុការណ៍នេះបានកើតឡើងនៅត្រង់ចំណុចចម្ការកៅស៊ូចាស់ ស្ថិតនៅក្នុងភូមិមួយ ឃុំឡាមិញ ស្រុកបរកែវ កាលពីថ្ងៃទី៩ ខែតុលា ឆ្នាំ២០២២។

សមត្ថកិច្ចបានឲ្យដឹងថា ជនរងគ្រោះឈ្មោះ រចំ ហន ភេទប្រុស អាយុ២៤ឆ្នាំ ជនជាតិទំពួន មានទីលំនៅភូមិមួយ ឃុំឡាមិញ ស្រុកបរកែវ ខេត្តរតនគិរី។

បន្ទាប់ពីទទួលបានព័ត៌មានភ្លាម កម្លាំងប៉ុស្តិ៍នគរបាលឃុំឡាមិញ កម្លាំងជំនាញនគរបាលផ្នែកពិនិត្យវិភាគរួមមានមេភូមិនិងក្រុមគ្រួសារជនរងគ្រោះ បានចុះទៅធ្វើការស្រាវជ្រាវ ពិនិត្យវិភាគកន្លែងកើតហេតុ និងពិនិត្យសាកសពឃើញថា ជនរងគ្រោះពិតជាស្លាប់ដោយសារថប់ដង្ហើមដោយដីបាក់សង្កត់ពីលើនៅក្នុងរណ្ដៅត្បូងពិតប្រាកដមែន។

ក្រោយពីពិនិត្យសាកសពរួច កម្លាំងជំនាញបានធ្វើកំណត់ហេតុប្រគល់សាកសពជូនទៅក្រុមគ្រួសារ និងសាច់ញ្ញាតិយកទៅធ្វើបុណ្យតាមប្រពៃណី។

សូមបញ្ជាក់ថា ប្រជាពលរដ្ឋនាំគ្នាទៅជីករណ្ដៅដីរកត្បូង បានស្លាប់ជាបន្តបន្ទាប់ដោយសារពួកគាត់ទៅជីករកត្បូង មិនគិតពីហានិភ័យដល់ខ្លួនឯង។ ប៉ុន្តែសមត្ថកិច្ចជំនាញមិនមានវិធានការទប់ស្កាត់ទៅលើបងប្អូនប្រជាពលរដ្ឋ ដែលនាំគ្នាទៅជីករកត្បូងទាំងនោះទេ បណ្ដែតបណ្ដោយឲ្យមានការស្លាប់ជាបន្តបន្ទាប់៕

អត្ថបទ៖ វុទ្ទឦសាន