សន្តិសុខសង្គម

ចោរធ្លាប់តែកាច់កម៉ូតូនៅទីប្រជុំជន និងតាមផ្សារ ពេលនេះចូលដល់ភូមិហើយ

បានផុស

២ years មុន

នៅ

ថ្ងៃពុធ ១៩ តុលា ២០២២

ដោយ

ប្រជាពលរដ្ឋក្នុងស្រុកសេសាន ព្រួយបារម្ភយ៉ាងខ្លាំង ខណៈពីមុនមកធ្លាប់តែមានចោរកាច់កម៉ូតូតាមផ្សារ និងទីប្រជុំជន តែពេលនេះ ក្រុមចោរបានចូលលួចកាច់កម៉ូតូដល់ផ្ទះទាំងយប់ ធ្វើឲ្យពួកគាត់ភ័យខ្លាចយ៉ាងខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ម៉ូតូមួយគ្រឿង ត្រូវបានចោរចូលលួចកាច់កដល់ក្នុងផ្ទះ កាលពីវេលាទៀបភ្លឺថ្ងៃទី ១៩ ខែតុលា ឆ្នាំ ២០២២ ចំណុចជិតវត្តកំភុន ភូមិកំភុន ស្រុកសេសាន ខេត្តស្ទឹងត្រែង។

លោក អ៊ួន សុខប៊ុន ជាម្ចាស់ម៉ូតូ បានឲ្យដឹងថា ម៉ូតូដែលគាត់បាត់ ម៉ាកសង់ ស៊េរីឆ្នាំ ២០២២ ពណ៌ក្រហម ស្លាកលេខព្រះសីហនុ 1J4455 បានបាត់នៅពេលទៀបភ្លឺថ្ងៃទី ១៩ ខែតុលា ឆ្នាំ ២០២២ នេះ។

លោកបន្តទៀតថា ជារៀងរាល់យប់ គាត់បានដាក់ម៉ូតូនៅផ្ទះ មិនដែលមានអ្វីកើតឡើងនោះទេ តែនៅយប់កើតហេតុនេះ ពេលគាត់ភ្ញាក់ពីដំណេក រកម៉ូតូមិនឃើញ បាត់ ដែលមិនដឹងពីហេតុការណ៍ពេលចោរចូលមកលួចតែម្ដង។

លោកថា កន្លងមកចោរលួចកាច់កម៉ូតូតាមទីប្រជុំជនក្នុងក្រុងផ្សារតែប៉ុណ្ណោះ តែរហូតមកដល់ពេលនេះ ភាពអសន្តិសុខបានចូលមកដល់ភូមិរបស់គាត់ហើយ។ លោកបានស្នើអាជ្ញាធរភូមិ-ឃុំ សមត្ថកិច្ចពាក់ព័ន្ធផងដែរ បើសិនឃើញភិនភាគម៉ូតូស្លាកលេខដូចខាងលើនេះ សូមមេត្តាឃាត់ទុក ដើម្បីចាត់វិធានការដល់ក្រុមចោរលួចទាំងនោះតាមផ្លូវច្បាប់ កុំឲ្យចេះតែដើរបង្កអសន្តិសុខដល់សង្គមទៀត៕

អត្ថបទ ៖ ងិន លីម

Related Topics:ករណីលួច