ចាប់ខ្លួនមេក្លោងគ្រឿងញៀនឆ្លងដែន​៣នាក់ ដកហូតគ្រឿងញៀន ១៦០គីឡូក្រាម

កម្លាំងជំនាញនៃមន្ទីរប្រឆាំងគ្រឿងញៀនចុះបង្ក្រាបករណីជួញដូរគ្រឿងញៀនឃាត់ជនសង្ស័យ៣នាក់ និងគ្រឿងញៀន ១៦០គីឡូក្រាមដែលឆ្លងដែនពីប្រទេសឡាវចូលមកកម្ពុជា។

ប្រតិបត្តិការបង្ក្រាបករណីជួញដូរគ្រឿងញៀនឆ្លងដែនខាងលើនេះ បានកើតឡើងកាលពីវេលាម៉ោង១៤និង១៥នាទី នៅថ្ងៃទី២៥ ខែតុលា ឆ្នាំ២០២២ នៅចំណុចផ្លូវលេខ៥៣ ស្ថិតក្នុងសង្កាត់ផ្សារថ្មី១ ខណ្ឌដូនពេញ រាជធានីភ្នំពេញ។

សមត្ថកិច្ចបានឲ្យដឹងថា កម្លាំងជំនាញ (ក៧)នៃមន្ទីរប្រឆាំងបទល្មើសគ្រឿងញៀន ដឹកនាំដោយលោកវរសេនីយ៍ឯក វ័រ វុទ្ធា នាយករងមន្ទីរ លោកវរសេនីយ៍ទោ សាន សុខបាន នាយរងការិយាល័យ(ក៧) មានការចូលរួមពីស្នងការដ្ឋាននគរបាលរាជធានភ្នំពេញ ព្រមទាំងមានការដឹកនាំសម្របសម្រួលដោយលោក ស៊ិត វណ្ណ: ព្រះរាជអាជ្ញារងនៃអយ្យការ​អមសាលាដំរាជធានីភ្នំពេញ បានធ្វើការស្រាវជ្រាវ បង្រ្កាបករណីជួញដូរគ្រឿងញៀនឆ្លងដែនពីប្រទេសឡាវ មកកម្ពុជា ជាលទ្ធផលឃាត់ជនសង្ស័យ៣នាក់។

ជនសង្ស័យទី១-ឈ្មោះ ង្វៀន ជុងហឹង ភេទប្រុស អាយុ៣៤ឆ្នាំ ជនជាតិ វៀតណាម។ ទី២-ឈ្មោះ ប៊ុន ស៊ូកែវអាពុន ភេទប្រុស អាយុ២៣ឆ្នាំ ជនជាតិ ឡាវ។ ទី៣-ឈ្មោះ លឹម កុយ ភេទប្រុសអាយុ៥៤ឆ្នាំ ជនជាតិ ខ្មែរ។ និងដកហូតថ្នាំញៀនប្រភេទ មេតំហ្វេតាមីន(ICE) ១៦០ដុំ ទម្ងន់ប្រមាណ១៦០គីឡូ។

បច្ចុប្បន្ន ជនសង្ស័យ និងវត្ថុតាងចាប់យកខាងលើសមត្ថកិច្ចជំនាញបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ បន្តតាមនីតិវិធី ៕

អត្ថបទ៖ សុខា