អាវុធហត្ថខេត្តកំពង់ចាម បញ្ជូនខ្លួននាយកទីចាត់ការហិរញ្ញវត្ថុសាលាខេត្តសៀមរាប មកតុលាការ ដើម្បីបន្តនិតិវិធី

នៅព្រឹកថ្ងៃទី២៧ ខែតុលា ឆ្នាំ២០២២នេះ កម្លាំងកងអាវុធហត្ថខេត្តកំពង់ចាម បានបញ្ជូនខ្លួនជនត្រូវចោទឈ្មោះ សោម សមសក្តិ មកសាលាដំបូងខេត្តកំពង់ចាមហើយ ។ ចំពោះនិតិវីធីបន្តយ៉ាងណានោះ យើងមិនដឹងនៅឡើយនោះទេ។

សូមបញ្ជាក់ថា ជនជាប់ចោទឈ្មោះ សោម សមសក្តិ មានតួនាទីជានាយកទីចាត់ការហិរញ្ញវត្ថុសាលាខេត្តសៀមរាបដែលជាជនដៃដល់ក្នុងសំណុំរឿងជេរប្រមាថជាសាធារណ: ប្រើអំពើហិង្សាដោយចេតនា និងប៉ុនប៉ងមនុស្សឃាត ត្រូវកម្លាំងកងរាជអាវុធហត្ថខេត្តកំពង់ចាម សហការជាមួយកម្លាំងកងរាជអាវុធហត្ថរាជធានីភ្នំពេញ ចាប់ខ្លួនកាលពីម៉ោង ជាង១១ថ្ងៃត្រង់ ថ្ងៃទី២៦ខែតុលា ឆ្នាំ២០២២ នៅទីក្រុងភ្នំពេញ គ្រាដែលជននេះព្យាយាមរត់គេចខ្លួនចេញពីខេត្តសៀមរាប។

ទោះបីយ៉ាងណាសមត្ថកិច្ចនៅមិនទាន់បញ្ជាក់លំអិតអំពីនិតិវិធីបន្តនោះទេ ប៉ុន្តែសមត្ថកិច្ចក្នុងហេតុការណ៍បានបង្ហើបអោយដឹងថា ជនជាប់ចោទឈ្មោះ សោម សមសក្តិ ដែលបានចាប់ខ្លួននឹងត្រូវបញ្ជូនទៅបន្តនិតិវិធីនៅឯខេត្តកំពង់ចាម។

ប្រភពពីកម្លាំងសមត្ថកិច្ចឲ្យដឹងថា ការចាប់ខ្លួននេះ បានធ្វើឡើងបន្ទាប់ពីជនដ៏មានឥទ្ធិពលនៅខេត្តសៀមរាប ម្នាក់នេះ ខកខានមិនបានចូលបំភ្លឺនៅសាលាដំបូងខេត្តសៀមរាប ទាំងតំណាក់កាលអយ្យការ និងតំណាក់កាលចៅក្រមស៊ើបសួរ ពាក់ព័ន្ធនឹងបណ្តឹងរបស់លោកស្រី ផាត់ សុជឿន ដែលប្តឹងពីបទជេរប្រមាថជាសាធារណ: បទប្រើអំពើហឹង្សាដោយចេតនា និងបទប៉ុនប៉ងមនុស្សឃាត ប្រព្រឹត្តនៅផ្សារទំនើបអាស៊ី ក្រុងសៀមរាប កាលពីយប់ថ្ងៃទី១៤ ខែមិថុនាឆ្នាំ២០២២។

ប្រភពបន្តថា ការចាប់ខ្លួននេះ ធ្វើឡើងបន្ទាប់ពីដើមបណ្តឹងរដ្ឋប្បវេណីលោកស្រី ផាត់ សុជឿន ដាក់ពាក្យផ្ទេរសមត្ថកិច្ចពីសាលាដំបូងខេត្តសៀមរាប មកតុលាការខេត្តកំពង់ចាម ។

សូមបញ្ជាក់ថា ជាប់ចោទឈ្មោះ សោម សមសក្តិ នាយកទីចាត់ការហិរញ្ញវត្ថុសាលាខេត្តសៀមរាប ត្រូវលោកស្រី ផាត់ សុជឿន ដាក់ពាក្យបណ្តឹង ប្តឹងពីបទជេរប្រមាថជាសាធារណ: បទប្រើអំពើហឹង្សាដោយ ចេតនា និងបទប៉ុនប៉ងមនុស្សឃាត តាមរយៈបើករថយន្តម៉ាក range rover discovery ពាក់ស្លាកលេខភ្នំពេញ 2BU-០០០៩ ប៉ុនប៉ងបំបុក នៅចំណុចផ្សារ អាស៊ី ក្នុងខេត្តសៀមរាប កាលពីយប់ថ្ងៃទី១៤ ខែមិថុនា ឆ្នាំ២០២២៕

អត្ថបទ៖ ឡេក ចាន់ពេជ្រ