អាជ្ញាធរព្រមានចាត់វិធានការក្តៅ លើអាជីវករ​លក់ដូររំលោភផ្លូវសាធារណៈជុំវិញផ្សារកំពង់ស្ពឺ

អាជ្ញាធរក្រុងច្បារមន បានធ្វើការព្រមានខ្លាំងៗចំពោះក្រុមអាជីវករដែលលក់ដូររំលោភលើចិញ្ចើមផ្លូវ និងលយចូលផ្លូវសាធារណៈជុំវិញផ្សារកំពង់ស្ពឺ ត្រូវប្រញ៉ាប់រុះរើចេញពុំដូច្នេះទេ អាជ្ញាធរនឹងមានវិធាកក្តៅរាល់ការខួចខាតទ្រព្យសម្បត្តិមិនទទួលខុសត្រូវឡើយ ។

នៅថ្ងៃទី២៨ ខែតុលា ឆ្នាំ២០២២នេះ រដ្ឋបាលក្រុងច្បារមន បានធ្វើការព្រមានក្រុមអាជីវករដែលលក់ដូរបង្ករភាពរញ៉េ​រញ៉ៃ​គ្មានសណ្តាប់ធ្នាប់ជុំវិញផ្សារកំពង់ស្ពឺថា អាជ្ញាធរបានធ្វើការជូនដំណឹងចំនួនពីរលើកកន្លងមកហើយ ស្តីពីវិធានការ ឲ្យបងប្អូនអាជីវករដែលកំពុងលក់ដូររំលោភផ្លូវសាធារណៈត្រូវរុះរើតូបលក់ដូរ និងសំយាបដោយខ្លួនឯងយ៉ាងយូបំផុតមុនថ្ងៃទី០១ ខែតុលា ឆ្នាំ២០២២ ប៉ុន្តែគ្មានប្រសិទ្ធភាពនោះឡើយ ។

ដោយមើលឃើញនូវសកម្មភាពលក់ដូរបែបអណាធិបតេយ្យរបស់បងប្អូនអាជីវករ នៅដែលដដែលៗមិនស្តាប់តាមការណែនាំរបស់អាជ្ញាធរបែបនេះ ទើបរដ្ឋបាលក្រុងច្បារមន សូមជម្រាបជូនដំណឹងសារជាថ្មី ដើម្បីក្រើនរម្លឹកដល់បងប្អូនអាជីវករលក់ដូរលើចំណីផ្លូវសាធារណៈ លយចេញក្រៅទាំងអស់ជ្រាបថា “រដ្ឋបាលក្រុងច្បារមន និងចាប់ផ្តើមអនុវត្តន៍វិធានការចំពោះតូបអាជីវករណាដែលមានការតសំយាបលក់ដូរលយចេញមកក្រៅ និងលក់លើចំណីផ្លូវសាធារណៈ ដោយផ្ទុយពីការណែនាំរបស់រដ្ឋបាលក្រុង ក្នុងពេលឆាប់ៗនេះដោយគ្មានការយោបយលទៀតឡើយ ។

ចុងក្រោយនេះ អាជ្ញាធរក្រុងច្បារមន បានសង្កត់ធ្ងន់ៗថា បងប្អូនអាជីវករលក់ដូរលើចំណីផ្លូវសាធារណៈ និងលក់លើចំណីផ្លូវសាធារណៈទាំងអស់មេត្តារុះរើតូប និងសំយាប ស្ថិតនៅលើផ្លូវសាធារណៈដែលធ្វើឲ្យមានផល់ប៉ះពាល់ការធ្វើចរាចរណ៍ សន្តិសុខសណ្តាប់ធ្នាប់ក្នុងបរិវេណផ្សារកំពង់ស្ពឺ ឱ្យបានឆាប់បំផុត ។

ក្នុងករណីមិនរុះរើចេញតាមការណែនាំខាងលើ រដ្ឋបាលក្រុងច្បារមននឹងចុះអនុវត្តវិធានការរដ្ឋបាលដោយមិនទទួលខុសត្រូវរាល់ការខូចខាត សម្ភារ ឬការបាត់បង់ទ្រព្យសម្បត្តិអ្វីឡើយ ។

សូមបញ្ជាក់ថា សណ្តាប់ធ្នាប់ជុំផ្សារកំពង់ស្ពឺ មានភាពរញ៉េរញ៉ៃ លក់ដូររំលោភលើផ្លូវសាធារណៈយ៉ាងអាណាធិបតេយ្យហើយវិធានការរៀបចំវិញគ្មានប្រសិទ្ធអ្វីទាំងអស់គ្រប់ជំនាន់ចៅហ្វាយក្រុងតែម្តង ៕

អត្ថបទ៖ ភួង រដ្ឋា