អភិបាលខេត្ត​ចុះពិនិត្យមើលផ្សារ​ ៣ថ្ងៃអាជ្ញាធរ​ប្រើវិធានការក្ដៅ​រៀបចំសណ្ដាប់ធ្នាប់​ជុំវិញផ្សារ​សាមគ្គីស្ទឹងត្រែង

អាជ្ញាធរខេត្តស្ទឹងត្រែងនៅព្រឹកថ្ងៃទី ១វិច្ឆិកាឆ្នាំ ២០២២នេះ បានបន្តចុះរៀបចំសណ្ដាប់ធ្នាប់ជុំវិញផ្សារសាមគ្គីស្ទឹងត្រែង ក្រោយពីលោកអភិបាលខេត្តចុះពិនិត្យមើលផ្សារបាន ៣ ថ្ងៃ។ ដោយប្រើនៅវិធានការក្តៅចំពោះអាជីវករមួយចំនួនដែលមិនបានស្ដាប់តាមការណែនាំរបស់អាជ្ញាធរ។

ប្រធានផ្សារបានកំណត់គោលការណ៍ចំនួន ៣ឲ្យអាជីវករត្រូវតែគោរពតាមនោះគឺអ្នកលក់ដូរក្នុងផ្សារ និងជុំវិញផ្សារទាំងអស់ត្រូវដាក់ អីវ៉ាន់ត្រឹមគំនូស ដែលបានរៀបចំហើយមិនអនុញ្ញាតឲ្យដាក់តាំងលក់ហួសខឿន ឬលើផ្លូវចូលផ្សារឡើយ។ ទី២-ចំពោះប្រជាពលរដ្ឋលក់ដូរបន្លែផ្លែឈើត្រីសាច់នៅលើខឿន ឬលើផ្លូវជុំវិញផ្សារ និងខាងជើងផ្សារទាំងអស់ មិន អនុញ្ញាតឲ្យលក់ដូរបន្តទៀតឡើយ គឺត្រូវរកទីតាំងលក់ដោយខ្លួនឯង។

ទី៣-ម្ចាស់ម៉ូតូដែលបានចតអនាធិបតេយ្យជុំវិញផ្សារ ក៏ត្រូវយកទៅផ្ញើរឲ្យបានសមរម្យ។ ក្នុងករណីមិនគោរពតាមការ ណែនាំនេះ នៅពេលអាជ្ញាធរចុះរៀបចំសណ្ដាប់ធ្នាប់ប៉ះពាល់ខូចខាតទ្រព្យសម្បត្តិមិនទទួលខុសត្រូវឡើយ។

គួរបញ្ជាក់ថាការរៀបចំសណ្ដាប់ធ្នាប់នៅជុំវិញបរិវេណផ្សារសាមគ្គីស្ទឹងត្រែងកាលពីព្រឹកមិញនេះ មានអាជីវករមួយចំនួនមិនសប្បាយចិត្ត ក៏ដោយសារតែពួកគាត់ចោទថាមិនស្មើភាពគ្នា។

ម្យ៉ាងទៀតចំពោះអ្នកលក់ដូរកញ្ច្រែងល្អីតូចតាចមានបន្លែត្រីសាច់បន្តិចបន្តួចឡើងពីភូមិឃុំមក ក៏ត្រូវហាម ឃាត់ ដោយ អាជ្ញាធរមិនបានរកទីតាំងឲ្យពួកគាត់តូចតាចបានលក់ដូរនឹងគេនោះឡើយ៕

អត្ថបទ៖ ងិនលីម