នគរបាលខេត្តកំពង់ចាម ចុះបង្ក្រាបទីតាំងល្បែងស៊ីសងឃាត់ខ្លួនមនុស្ស៧នាក់

មនុស្ស៧នាក់លួចលេងល្បែងស៊ីសងខុសច្បាប់ (ជល់មាន់ភ្នាល់ដាក់ប្រាក់) ត្រូវលោក សុធា ពិសិដ្ឋ ព្រះរាជអាជ្ញារងនៃអយ្យការអមសាលាដំបូងខេត្តកំពង់ចាម ដឹកនាំកម្លាំងសមត្ថកិច្ចផ្ទាល់ធ្វើការចុះបង្ក្រាប បន្ទាប់ពី រៀងចាល ។ ប្រតិបត្តិការនេះធ្វើឡើងកាលវេលាម៉ោង១១និង០០នាទី ថ្ងៃទី០៩ ខែវិច្ឆិកា ឆ្នាំ២០២២ នៅចំណុចចំការគ ភូមិកោះគល់ ឃុំកោះរការ ស្រុកកំពង់សៀម ខេត្តកំពង់ចាម។

លោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានអោយដឹងថា បន្ទាប់ពីទទួលបានបណ្តឹងពីប្រជាពលរដ្ឋភ្លាម លោកបានបញ្ជាដល់កម្លាំងជំនាញរបស់ផែនការងារនគរបាលព្រហ្មទណ្ឌ សហការជាមួយកម្លាំងជំនាញរបស់អធិការដ្ឋាននគរបាលស្រុកកំពង់សៀម និងអាជ្ញាធរមូលដ្ឋាន ដោយក្នុងកិច្ចប្រតិបត្តិការក្រោមការដឹកនាំសម្របសម្រួលផ្ទាល់ពីលោក សុធា ពិសិដ្ឋ ព្រះរាជអាជ្ញារងនៃអយ្យការ​អមសាលាដំបូងខេត្តកំពង់ចាម ចុះបង្ក្រាបករណីលួចលេងល្បែងស៊ីសងខុសច្បាប់ (ជល់មាន់ភ្នាល់ដាក់ប្រាក់) នៅចំណុចចំការគ ភូមិកោះគល់ ឃុំកោះរការ ស្រុកកំពង់សៀម។

ក្នុងប្រតិបត្តិការនេះកម្លាំងសមត្ថកិច្ចបានដកហូតវត្ថុតាងរួមមាន÷ ប្រាក់ ១៥០,០០០រៀល  (ដប់ប្រាំម៉ឺនរៀល) ២-ទូរស័ព្ទដៃចំនួន០៥គ្រឿង ៣-ស្គុតរុំខ្នាយមាន់ចំនួន០២ដុំ ៤-ម៉ូតូចំនួន០៧ គ្រឿង​(រក្សាទុកនៅប៉ុស្តិ៍នគរបាលរដ្ឋបាលកោះរការ)។

បច្ចុប្បន្ន ជនសង្ស័យទាំង០៧នាក់ រួមនឹងវត្ថុតាងខាងលើត្រូវបានបញ្ជូនមកកាន់ស្នងការដ្ឋាននគរបាលខេត្តកំពង់ចាម ដើម្បីចងក្រងសំណុំរឿងតាមនីតិវិធីច្បាប់ ៕

អត្ថបទ៖ ឡេក ចាន់ពេជ្រ