២ គោលដៅ ក្នុងស្រុកជាប់ព្រំដែនថៃ ត្រូវបានសមត្ថកិច្ចចុះពិនិត្យទប់ស្កាត់បទល្មើស គ្រឿងញៀន

ដោយសាតែស្រុកភ្នំព្រឹក ខេត្តបាត់ដំបង ជាគោលដៅមុខសញ្ញាគួរឱ្យកត់សម្គាល់ក្នុងចំណោមស្រុកជាប់ព្រំដែនកម្ពុជា-ថៃ ទើបលោកស្នងខេត្តការដាក់បទបញ្ជាឱ្យរៀបចំកម្លាំងដោយមានការសហការគ្នាជាមួយកម្លាំងសមត្ថកិច្ចពាក់ព័ន្ធចុះពង្រឹង និងត្រួតពិនិត្យទៅលើបទល្មើសដែលមានសារធាតុញៀនគ្រប់ប្រភេទ។

កិច្ចប្រតិបត្តិការខាងលើនេះ អនុវត្តដោយកម្លាំងស្នងការខេត្ត រួមសហការជាមួយកម្លាំ​ងងមូលដ្ឋាន កងរាជអាវុធហត្ថកម្លាំងនគរ​បាលវរសេនាតូចការពារព្រំដែនគោក៨១៩ និងកម្លាំងនគរបាល នៃអធិការដ្ឋាននគរបាលស្រុកភ្នំព្រឹក ត្រួតពិនិត្យលេីគោលដៅចំនួន ២គោល​ដៅ ​ក្នុងគោលបំណងបង្ការទប់ស្កាត់ និងបង្រ្កាបបទល្មើសគ្រឿងញៀន និងសារធាតុគីមីផ្សំ​គ្រឿង​ញៀនខុសច្បាប់ដែលអាចត្រូវបានដឹកជញ្ជូនលេីដងផ្លូវឆ្លងកាត់ក្នុងភូមិសាស្រ្តជាប់ព្រំដែន ក្នុងស្រុកភ្នំព្រឹក ខេត្តបាត់ដំបង។ នេះបើតាមការលើកឡើងឱ្យដឹងពីមន្ត្រីនៃស្នងការខេត្តបាត់ដំបង។

ប្រភពខាងលើបន្តថា ការពង្រឹងករណីខាងលើនេះ កន្លងបានកំណត់យក ២គោលដៅផ្សេងគ្នាដែលជាគោលដៅមុខសញ្ញា ក្នុងនោះមាន: គោលដៅទី១៖ នៅចំណុចផ្លូវលេខ៥៩ ក្រុមទី៥ ភូមិពេជ្រចិន្តា ឃុំពេជ្រចិន្តា ស្រុកភ្នំព្រឹក ខេត្តបាត់ដំបង បានពិនិត្យលើរថយន្តចំនួន ៣៤៥គ្រឿង មនុស្ស ៦៥៥នាក់ ស្រី ២២៧នាក់ ក្នុងនោះមាន រថយន្តធុនធំ ចំនួន ១៣៧គ្រឿង មនុស្ស ២១៧​នាក់ ស្រី ១០៩នាក់។ រថយន្តធុនតូចចំនួន ២០៨គ្រឿង មនុស្ស ៤៣៨​នាក់ ​ស្រី ១១៨នាក់ និងម៉ូតូចំនួន ៦០គ្រឿង មនុស្ស ១៣៥នាក់ ស្រី ៧៣នាក់។

គោលដៅទី២៖ ផ្លូវលេខ៥៧B ក្រុម​ទី៦ ភូមិអូរ ឃុំពេជ្រចិន្តា ស្រុកភ្នំព្រឹក បានពិនិត្យ រថយន្តចំនួន ២៥៧គ្រឿង មនុស្ស ៤៥០នាក់ ស្រី ២១៥នាក់ និងម៉ូតូ​ ១៣៥គ្រឿង មនុ​ស្ស ២៦៥នាក់ ស្រី​ ១១៥នាក់ ក្នុងនោះមាន រថយន្ត ធុនធំ ចំនួន ១០៥គ្រឿង មនុស្ស ១៧៥នាក់ ស្រី ៨៨នាក់។ រថយន្តធុនតូចចំនួន ១៥២គ្រឿង មនុស្ស ២៧៥​នាក់ ស្រី ២១៥នាក់ និងម៉ូតូ ១៣៥គ្រឿង មនុស្ស ២៦៥នាក់ ស្រី ១១៥នាក់។

មន្ត្រីខាងលើបញ្ជាក់ថា ដោយសាតែមានការរឹតបន្តឹងជាបន្តបន្ទាប់កន្លងមកតាមបទបញ្ជារបស់ថ្នាក់ដឹកនាំ ទើបលទ្ធផលសរុបទាំង២គោលដៅខាងលើនេះ សមត្ថកិច្ចពុំបានរកឃើញសារធាតុគីមីផ្សំ គ្រឿងញៀនខុសច្បាប់ នោះឡើយ៕

អត្ថបទ៖ សៅ សារិទ្ធ