ចាប់ខ្លួនក្រុមចោរឆក់ម្នាក់​ ខណៈពីរនាក់កំពុងគេចខ្លួន

ជនសង្ស័យម្នាក់ក្នុងចំណោមបក្ខពួក២នាក់ទៀតត្រូវបានប្រជាពលរដ្ឋឃាត់ខ្លួនប្រគល់ជូនសមត្ថកិច្ចបន្ទាប់ពីពួកគេជិះម៉ូតូធ្វេីសកម្មភាពឆក់ខ្សែកពីស្ត្រីម្នាក់មិនបានសម្រេច កាលពីវេលាម៉ោង១២និង៤០នាទីរសៀល ថ្ងៃទី៣០ ខែវិច្ឆិកា ឆ្នាំ​២០២២ នៅផ្លូវបេតុង ភូមិព្រៃសិលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យឈ្មោះ ប៉ុក រតនា ហៅវាសនា ភេទប្រុសអាយុ១៧ឆ្នាំ មុខរបមិនពិតប្រាកដ ស្នាក់នៅសង្កាត់ភ្នំពេញថ្មី ខណ្ឌសែនសុខ។ ចំណែកជនរងគ្រោះឈ្មោះ អៀន ផល្លី អាយុ៤០ឆ្នាំ ស្នាក់នៅភូមិព្រៃសិលា សង្កាត់កាកាបទី២ ខណ្ឌពោធិ៍សែនជ័យ ។

តាមប្រភពព័ត៌មានបានឲ្យដឹងថា មុនពេលកេីតហេតុជនរងគ្រោះជិះម៉ូតូចេញពីផ្ទះបំណងទៅផ្សាររកទិញម្ហូប ខណៈជិះចេញបានបន្តិចស្រាប់តែជនសង្ស័យមានគ្នា៣នាក់ជិះម៉ូតូ២គ្រឿង ដោយមួយគ្រឿងម៉ាកហុងដាឌ្រីម និងមួយគ្រឿងទៀតម៉ាកស្កូបពីពណ៌ស ពាក់ស្លាកលេខភ្នំពេញ1JJ 0540 ធ្វេីដំណេីរបញ្ច្រាសទិសគ្នា។

ប្រភពដដែលបានបន្តថា ខណៈជិះទុលមុខគ្នាជនសង្ស័យឃេីញជនរងគ្រោះពាក់ខ្សែកដាក់ខាងក្រៅអាវទំនងក៏ជិះ​ហួស​ហេីយទេីបត្រឡប់មកវិញធ្វេីសកម្មភាពឆក់យកខ្សែកតែជនរងគ្រោះដឹងខ្លួនមុនទេីបក្រសោបបានខ្សែមកវិញបាត់បន្តោងត្រូវជនសង្ស័យយកទៅបាត់។ ភ្លាមនោះជនរងគ្រោះស្រែកថា ចោរៗទេីបបង្កការភ្ញាក់ផ្អេីលដល់ប្រជាពលរដ្ឋដែលនៅខាងមុខនាំគ្នាស្ទាក់ចាប់បានម្នាក់ដែលបិទគូទជិះម៉ូតូស្កូបពីចំណែក២នាក់ទៀតគេចខ្លួនបាត់។ ក្រោយកេីតហេតុជនសង្ស័យត្រូវបានប្រជាពលរដ្ឋប្រគល់ជូនសមត្ថកិច្ចដេីម្បីចាត់ការតាមច្បាប់៕

អត្ថបទ៖ សុខា