សាកសួររកផ្លូវបែរជាដកអាវុធខ្លី​ភ្ជង់ប្លន់យកម៉ូតូ​មួយគ្រឿងទៅបាត់​នៅសង្កាត់រលួស​

ជនសង្ស័យ២នាក់ជិះម៉ូតូមួយគ្រឿងឃាត់ហៅយុវជន២នាក់ដោយប្រើល្បិចហៅសួរនាំរកផ្លូវ​​ផ្ទុយទៅវិញបានដកកាំភ្លើងខ្លីភ្ជង់គម្រាមប្លន់យកទៅបាត់ដោយ​សុវត្តិភាព បង្កការភ្ញាក់ផ្អើលកាលពីវេលា​ម៉ោង៧ និង៤៥ នាទីយប់ថ្ងៃទី ០១ ខែធ្នូ ឆ្នាំ២០២២ ចំណុចស្ពានផ្លូវ៦០ម៉ែត្រថ្មី ភូមិកណ្តាល សង្កាត់​រលួស ខណ្ឌដង្កោ រាជធានីភ្នំពេញ ជាប់ព្រំប្រទល់ឃុំជើងកើប ស្រុកកណ្តាលស្ទឹង ខេត្តកណ្តាល។

ម៉ូតូដែលជនសង្ស័យយកទៅបាត់ ម៉ាកហុងដាឌ្រីម សេរី២០២២ ពណ៌ខ្មៅ ពាក់ស្លាកលេខ កណ្តាល 1AL-5051 ម្ចាស់ជនរងគ្រោះឈ្មោះ វង្ស ផល្លា ភេទប្រុស អាយុ២១ឆ្នាំ មានទីលំនៅភូមិសៀមរាប ឃុំសៀមរាប ស្រុកកណ្តាលស្ទឹង ខេត្តកណ្តាល។

តាមប្រភពបានឲ្យដឹងថា មុនកើតហេតុ ជនរងគ្រោះគ្នា២នាក់ជិះម៉ូតូតាមផ្លូវ ១០៤ ពីលិចទៅកើត ដល់ចំណុចលើស្ពានអាកាសថ្មីឈប់អុជបារីជក់រៀបនឹងជិះចេញទៅហើយស្រាប់តែជនសង្ស័យគ្នា២នាក់ ជិះម៉ូតូហុងដាឌ្រីមពណ៌ខ្មៅ មិនចាំស្លាកលេខពីកើតទៅលិចបញ្ច្រាសទិសគ្នាមកឈប់ទន្ទឹម ប្រើល្បិចឃាត់សាកសួរលើជនរងគ្រោះ «ផ្លូវមួយណាទៅវត្តស្លែង ផ្លូវជាតិលេខ៣?» គ្រាន់តែជនរងគ្រោះចង្អុរប្រាប់ផ្លូវហើយ ស្រាប់តែជនសង្ស័យដកកាំភ្លើងខ្លីភ្ជង់គម្រាមប្លន់យកម៉ូតូ ជិះឆ្ពោះទៅទិសខាងលិចបាត់។

ក្រោយកើតហេតុ ទើបផ្អើលឆោឡោដល់ពលរដ្ឋកម្លាំងប្រជាការពារ សង្កាត់ជើងកើប ស្រុកកណ្តាលស្ទឹង ខេត្តកណ្តាល ទៅដល់សាកសួរនាំរួចជូនជនសង្ស័យទៅដាក់ពាក្យបណ្តឹងនៅសង្កាត់រលួស ខណ្ឌដង្កោ ដើម្បីឲ្យសមត្ថកិច្ចជួយស្រាវជ្រាវ៕

អត្ថបទ៖ សុខា