ព្រះរាជអាជ្ញាដោះលែងអ្នកចេញសែកស្អុយ១លានដុល្លារឲ្យត្រឡប់ទៅវិញ

នៅទីបំផុត លោក លឹម ប៊ុនហេង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ បានសម្រេចដោះលែងនារីវ័យក្មេងអោយមានសេរីភាពវិញ ពោលគឺអោយត្រឡប់ទៅផ្ទះដោយមិនបញ្ជូនទៅចៅក្រមសើបសួរឡើយ ពាក់ព័ន្ធករណីចេញមូលប្បទានប័ត្រគ្មានប្រាក់ដល់ទៅជាង១លានដុល្លារ ។

ជនសង្សូយដែលសមត្ថកិច្ចនាំខ្លួនមកកាន់តុលាការនេះឈ្មោះ លី ឈីវហ៊ុយ ភេទស្រី អាយុ២៥ឆ្នាំ មានទីលំនៅផ្ទះលេខ ១៧ ផ្លូវ៤៨៤ សង្កាត់ផ្សារដើមថ្កូវ ខណ្ឌចម្ការមន ។

កញ្ញា លី ឈីវហ៊ុយ ត្រូវបាននគរបាលនាំខ្លួនតាមដីកាបញ្ជាអោយចូលខ្លួនលេខ ៥២២ អយឍ ចុះថ្ងៃទី ២៤ខែវិច្ឆិកា ឆ្នាំ២០២២ របស់លោក លឹម ប៊ុនហេង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ក្រោមបទចោទប្រកាន់ « ឆបោក មិនបំពេញកតព្វកិច្ចចំពោះឧបករណ៍ដែលអាចជួញដូរបាន និងប្រតិបត្តិការទូទាត់ប្រាក់ » ។

កញ្ញា លី ឈីវហ៊ុយ ត្រូវបាននគរបាលប្រទះឃើញធ្វើដំណើរតាមផ្លូវព្រះមុនីវង្ស ក្នុងសង្កាត់បឹងកេងកង ខណ្ឌបឹងកេងកង កាលពីថ្ងៃទី១០ ខែធ្នូ ឆ្នាំ២០២២ ក៏អញ្ជើញមកការិយាល័យតាមដីកាអយ្យការតែម្ដង ។

ពាក់ព័ន្ធករណីនេះ ប្រភពមួយបានទំលាយអោយដឹងថា រឿងបំណុលជាង១លានដុលា្លរនោះ គឺម្ដាយរបស់នាងកញ្ញាជាអ្នកជាប់ពាក់ព័ន្ធ ប៉ុន្តែកញ្ញា លី ឈីវហ៊ុយ ជាអ្នកចេញមូលប្បទានប័ត្រគ្មានប្រាក់សងទៅម្ចាស់បំណុលឈ្មោះ គឺម រ៉ុង ភេទស្រី ដែលបានដាក់ពាក្យប្ដឹងតាំងពីថ្ងៃទី១៧តុលា ឆ្នាំ២០២២ មកម្ល៉េះ ។

លុះដល់ព្រឹកថ្ងៃទី១២ ខែធ្នូ ឆ្នាំ២០២២ សមត្ថកិច្ចនគរបាលព្រហ្មទណ្ឌកំរិតធ្ងន់រាជធានីភ្នំពេញបានបញ្ជូនមកកាន់អយ្យការអមសាលាដំបូងដោយមានលោក លឹម ប៊ុនហេង ព្រះរាជអាជ្ញារងទទួលបន្ទុកធ្វើការសាកសួរជនសង្ស័យពេញមួយថ្ងៃ រហូតដល់ល្ងាចថ្ងៃ១២ធ្នូដដែល លោក លឹម ប៊ុនហេង បានសម្រេចដោះលែងជនសង្ស័យអោយត្រឡប់ទៅវិញដោយសុវត្ថិភាព ៕

អត្ថបទ៖ មករា