សន្តិសុខសង្គម

ចាប់ខ្លួននាយកក្រុមហ៊ុនចេញសែកអត់លុយ ១០ ម៉ឺនដុល្លារ

បានផុស

២ years មុន

នៅ

ថ្ងៃពុធ ១៤ ធ្នូ ២០២២

ដោយ

សមត្ថកិច្ចកងរាជអាវុធហត្ថលើផ្ទៃប្រទេស កាលពីថ្ងៃទី ១៣ ខែធ្នូ ឆ្នាំ ២០២២ នេះ បានចាប់បញ្ជូនខ្លួននាយកក្រុមហ៊ុនមួយ មកអយ្យការអមសាលាដំបូងរាជធានីភ្នំពេញ ពាក់ព័ន្ធបទល្មើស «មិនបំពេញកាតព្វកិច្ចចំពោះឧបករណ៍អាចជួញដូរបាន» ចេញសែកស្អុយមានទឹកប្រាក់ ១០ ម៉ឺនដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យឈ្មោះ អេង សុភាព អាយុ ៤៥ ឆ្នាំ មានទីលំនៅបច្ចុប្បន្នផ្ទះលេខ ១៥២d ផ្លូវ ៥៩៨ ភូមិ ៥ សង្កាត់បឹងកក់ ២ ខណ្ឌទួលគោក មុខរបរជានាយកក្រុមហ៊ុន (ប៊ី វាយ ជី វើល៍វាយ គ្រុប)។

ពាក់ព័ន្ធករណីនេះ ប្រភពព័ត៌មានពីសាលាដំបូងបានឲ្យដឹងថា កាលពីអំឡុងឆ្នាំ ២០២២ ឈ្មោះ គឹង វណ្ណៈ ភេទប្រុស ជាមិត្តភ័ក្ដិរបស់ម្ចាស់បំណុល បានខ្ចីប្រាក់ដើមបណ្ដឹងមួយចំនួនធំសម្រាប់ធ្វើការរកស៊ី ដោយមានដាក់ប័ណ្ណសម្គាល់អចលនវត្ថុធានាលើសំណង។ លុះដល់ថ្ងៃកំណត់ត្រូវសងប្រាក់ ឈ្មោះ គឹង វណ្ណៈ ពុំមានប្រាក់ទាន់ពេលវេលាទេ ប៉ុន្តែបានប្រាប់បើត្រូវការប្រាក់បន្ទាន់ឲ្យយកប័ណ្ណដីដែល គឹង វណ្ណៈ ដាក់ធានាយកទៅកាត់ផ្ទេរឈ្មោះឲ្យ អេង សុភាព ទើបអាចទទួលលុយបាន។

បន្ទាប់មកម្ចាស់បំណុល ក៏បានព្រមព្រៀងគ្នាជាមួយឈ្មោះ អេង សុភាព កាត់ផ្ទេរប្លង់ដី ហើយឈ្មោះអេង សុភាព ក៏បានចេញមូលប្បទានប័ត្រមានទឹកប្រាក់ ១០ ម៉ឺនដុល្លារ ឲ្យមកម្ចាស់បំណុល។ លុះដល់ថ្ងៃបើកប្រាក់ ស្រាប់តែខាងធនាគារបញ្ជាក់ថា មូលប្បទានប័ត្រនោះគ្មានប្រាក់ទេ ទើបម្ចាស់បំណុលស្វែងរកឈ្មោះ អេង សុភាព ដើម្បីដោះស្រាយ ប៉ុន្តែជននេះគេចវេះរហូត ទើបម្ចាស់បំណុលប្ដឹងមកសមត្ថកិច្ច និងតុលាការចាត់ការតែម្ដង៕

អត្ថបទ ៖ មករា