សន្តិសុខសង្គម

ក្រុមចោរលួចគោពលរដ្ឋចំនួន ៦ ក្បាល ទៅដោយសុវត្ថិភាព មិនរំខានដល់សមត្ថកិច្ច

បានផុស

២ years មុន

នៅ

ថ្ងៃអង្គារ ២០ ធ្នូ ២០២២

ដោយ

សត្វគោធំៗចំនួន ៦ ក្បាល ចំណោមគោទាំង ១០ ក្បាល ដែលពលរដ្ឋចងក្នុងចម្ការ ត្រូវបានក្រុមចោរលួចយកទៅបាត់ដោយសុវត្ថិភាព ខណៈម្ចាស់គោដេកលង់លក់ក្នុងដំណេកមួយភាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីនេះបានកើតឡើងកាលពីវេលាម៉ោងប្រមាណ ២ រំលងអធ្រាត្រ ឈានចូលថ្ងៃទី ១៩ ខែធ្នូ ឆ្នាំ ២០២២ ចំណុចក្នុងដីចម្ការមួយកន្លែង ឆ្ងាយពីភូមិ ស្ថិតនៅភូមិភ្នំប្រាំពីរ ឃុំបួរ ស្រុកភ្នំព្រឹក ខេត្តបាត់ដំបង។

តាមការបំភ្លឺពីម្ចាស់គោឈ្មោះ ហយ រឿន ភេទប្រុស អាយុ ៥១ ឆ្នាំ បានឲ្យដឹងថា ក្នុងចំណោមសត្វគោចំនួន ១០ ក្បាល ដែលគាត់យកទៅចងជុំគ្នាមួយកន្លែង នៅក្នុងចម្ការនោះ ត្រូវក្រុមចោរលួចដឹកយកគោធំៗអស់ចំនួន ៦ ក្បាល ពេលលោកដេកលង់លក់មួយភាំង។

លោកបានបន្តថា លោកឃើញស្នាមដានជើងគោដែលក្រុមចោរបានដឹកចេញពីចម្ការ សំដៅទៅផ្លូវជាតិ ទំនងមានរថយន្តឈប់រង់ចាំដឹកនៅទីនោះ ហើយក្រុមចោរក៏ទំនងជាមានគ្នាច្រើនផងដែរ ទើបអាចធ្វើរឿងនេះទៅបានបែបនេះ។

ដោយឡែកលោក បូ បុល នាយប៉ុស្តិ៍រដ្ឋបាលឃុំបួរ បានបញ្ជាក់ឲ្យអ្នកសារព័ត៌មានដឹងថា នេះមិនមែនជាលើកដំបូងទេ ដែលក្រុមចោរហារយនាំគ្នាចេញលួចគោទាំងហ្វូងៗ ដឹកតាមរថយន្តយ៉ាងនេះ ដោយបច្ចុប្បន្នសមត្ថកិច្ចកំពុងធ្វើការស្រាវជ្រាវហើយ។

ករណីនេះដែរ កាលពីប៉ុន្មានខែមុន ក្រុមចោរដែលមានលក្ខណៈស្រដៀងគ្នានេះ ក៏បាននាំគ្នាបើករថយន្តទៅលួចដឹកសត្វក្របីអ្នកភូមិចំនួន ៤ ក្បាល ចេញពីក្នុងក្រោលដោយសុវត្ថិភាពដែរ នៅ ស្រុកបាណន់ ប៉ុន្តែហាក់មិនរំខានដល់សមត្ថកិច្ចណាមួយឡើយ៕

អត្ថបទ ៖ សោ និយមរ័ត្ន