ខណ្ឌរដ្ឋបាលជលផលកំពង់ឆ្នាំង ដោះលែងម្ចាស់ទូកនេសាទ៣គ្រឿងវិញហើយ បន្ទាប់ពីពិន័យអន្តរកាលក្នុងមួយគ្រឿង១លាន៥០ម៉ឺនរៀល

លោក តាត សីហៈ នាយសង្កាត់នេសាទកំពង់ឆ្នាំង នៃខណ្ឌរដ្ឋបាលជលផលកំពង់ឆ្នាំង នៅព្រឹកថ្ងៃទី២២ ខែធ្នូ នេះបានឲ្យដឹងថា កាណូតអូសនាមសម័យ៣គ្រឿងដែលសមត្ថកិច្ចចាប់បានកាលពីព្រឹកថ្ងៃទី២១ ខែធ្នូ ត្រូវបានធ្វើការផាកពិន័យអន្តរការរួចហើយ និងនៅល្ងាចថ្ងៃទី២១ ក្រោយពីពួកគេបានបង់ថវិកាផាកពិន័យអន្តការរួច សមត្ថកិច្ចក៏បានអនុញ្ញាតឲ្យវិលទៅកាន់លំនៅឋានវិញ។

មន្ត្រីជលផលរូបនេះបានបញ្ជាក់ឲ្យដឹងថា កំហុសឆ្គងរបស់កាណូតអូសនាមសម័យទាំងបីគ្រឿងខាងលើនេះ គឺ៣គ្រឿង នៅខេត្តកណ្ដាល មានលិខិតអនុញ្ញាតពីរដ្ឋបាលជលផលខេត្តកណ្ដាល ឲ្យធ្វើការនេសាទក្នុងភូមិសាស្ត្រខេត្តកណ្ដាល តែពួកគេពន្លាតដែននេសាទរហូតដល់ខេត្តកំពង់ឆ្នាំង គឺខុសភូមិសាស្ត្រនេសាទ ។ ចំណុចទី២ ខុសបច្ចេកទេស គឺម៉ាស៊ីនក្នុងច្បាប់ឲ្យប្រើម៉ាស៊ីនកម្លាំង១០សេះ ប៉ុន្តែពួកគេប្រើម៉ាស៊ីនអូសកម្លាំង២៤សេះ ចំពោះក្រឡាសាច់អួនអូសគឺប្រើប្រាស់ត្រឹមត្រូវស្របច្បាប់។

ករណីកំហុសឆ្គងខាងលើនេះ រដ្ឋបាលជលផលកំពង់ឆ្នាំងបានផាកពិន័យអន្តរការក្នុងមួយគ្រឿងៗ ១លាន ៥០ម៉ឺនរៀល បង់ចូលថវិកាជាតិ ហើយពួកគេក៏បានយល់ព្រមបង់ការផាកពិន័យអន្តរការតាមផ្លូវច្បាប់ ទើបសមត្ថកិច្ចយើងធ្វើការដោះលែងវិញ៕

អត្ថបទ៖ ឈៀងថារិទ្ធ