សន្តិសុខសង្គម

ឆេះអគារបុគ្គលិកមួយខ្នង ក្នុងកសិដ្ឋានផលិតស្រូវពូជ អស់ទ្រព្យសម្បត្តិប្រមាណ ៣២០ លានរៀល

បានផុស

២ years មុន

នៅ

ថ្ងៃព្រហស្បតិ៍ ២៩ ធ្នូ ២០២២

ដោយ

ទ្រព្យសម្បត្តិ និងលុយកាក់ របស់មន្ត្រីស្នាក់នៅក្នុងកសិដ្ឋានចំនួន ៤ គ្រួសារ ដែលត្រូវបានអគ្គិភ័យឆាបឆេះទាំងរំលងអធ្រាត្រ សរុបជាទឹកប្រាក់ប្រមាណ ៣២០ លានរៀល នេះមិនគិតអំពីអគារស្នាក់នៅឡើយ បញ្ហានេះមិនទាន់ដឹងមូលហេតុទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីអគ្គិភ័យនេះបានកើតឡើងនាថ្ងៃទី ២៩ ខែធ្នូ ឆ្នាំ ២០២២ វេលាម៉ោង ០០ និង ៤០នាទីរំលងអធ្រាត្រ ស្ថិតនៅទីតាំងកសិដ្ឋានផលិតពូជស្រូវទួលសំរោង ភូមិអូរញរ ឃុំបឹងព្រីង ស្រុកថ្មគោល ខេត្តបាត់ដំបង ដោយបានឆាបឆេះអគារបុគ្គលិករបស់រដ្ឋ ០១ ខ្នង មាន ០៤ បន្ទប់ (ខូចខាតទាំងស្រុង) ទំហំ ៦ ម x៣៦ ម ធ្វើអំពីឈើ ប្រក់ហ្វីប្រូស៊ីម៉ងត៍ ជញ្ជាំងថ្ម សម្រាប់ស្នាក់នៅ ០៤ គ្រួសារ។

គ្រួសារបុគ្គលិកដែលរងគ្រោះរួមមាន ៖

១.ឈ្មោះ ឆាយ ឈីម ភេទប្រុស អាយុ ៥១ ឆ្នាំ រស់នៅភូមិអូរញរ ឃុំបឹងព្រីង សម្ភារៈក្នុងបន្ទប់ខូចខាតទាំងស្រុង គិតជាទឹកប្រាក់ប្រហែល ១២០ លានរៀល។

២.ឈ្មោះ ហ៊ីង សាង ភេទស្រី អាយុ ៧០ ឆ្នាំ រស់នៅភូមិអូរញរ ឃុំបឹងព្រីង សម្ភារៈក្នុងបន្ទប់ខូចខាតទាំងស្រុង គិតជាទឹកប្រាក់ប្រហែល ២០ លានរៀល។

៣.ឈ្មោះ ញ៉ុង សួន ភេទប្រុស អាយុ ៧២ ឆ្នាំ រស់នៅភូមិអូរញរ ឃុំបឹងព្រីង ការខូចខាតរួមមានម៉ូតូ ០១ គ្រឿង និងសម្ភារៈមួយចំនួនខូចខាតទាំងស្រុង គិតជាទឹកប្រាក់ប្រហែល ២០ លានរៀល។

៤.ឈ្មោះ ជួរ រតនៈ ភេទប្រុស អាយុ ៥២ ឆ្នាំ រស់នៅភូមិអូរញរ ឃុំបឹងព្រីង សម្ភារៈក្នុងបន្ទប់ខូចខាតទាំងស្រុង សរុបគិតជាទឹកប្រាក់អស់ប្រហែល ១៦០ លានរៀល។ នៅក្នុងគ្រោះអគ្គិភ័យនេះ ពុំមានប៉ះពាល់ដល់អាយុជីវិតមនុស្សឡើយ។

ភ្លាមៗនោះដែរ សមត្ថកិច្ចបានចេញរថយន្តពន្លត់អគ្គិភ័យចំនួន ៤ គ្រឿង ដោយរថយន្តស្រុក ០១ គ្រឿង និងរថយន្តការិយាល័យជំនាញខេត្តចំនួន ៣ គ្រឿង។ រីឯមូលហេតុ សមត្ថកិច្ចកំពុងស្រាវជ្រាវនៅឡើយ៕

អត្ថបទ ៖ សោ និយមរ័ត្ន