សន្តិសុខសង្គម

កាយដីធ្វើប្រព័ន្ធលូ កណ្ដាលក្រុង ប្រទះឃើញគ្រាប់ប្លោងប្រភេទធ្ងន់មួយគ្រាប់

បានផុស

២ years មុន

នៅ

ថ្ងៃអង្គារ ១០ មករា ២០២៣

ដោយ

ក្បាលគ្រាប់ប្លោងធុនធ្ងន់មួយគ្រាប់ ត្រូវបានក្រុមការងារបច្ចេកទេស នៃមន្ទីរសាធារណការ និងដឹកជញ្ជូនខេត្ត ប្រទះឃើញ ខណៈកំពុងកាយផ្លូវដើម្បីដាក់ប្រព័ន្ធលូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ុន្មានថ្ងៃ នាចុងខែធ្នូ និងដើមខែមករាកន្លងទៅនេះ ក្រុមជំនាញ នៃមន្ទីរសាធារណការខេត្ត បានប្រើប្រាស់គ្រឿងចក្រ ធ្វើការកាយផ្លូវស្ទើរតែគ្រប់ច្រកល្ហក ដើម្បីដាក់ប្រព័ន្ធលូ បើទោះបីជាផ្លូវទើបក្រាលកៅស៊ូហើយថ្មីៗក៏ដោយ។

លុះកាលពីថ្ងៃទី ៩ ខែមករា ឆ្នាំ ២០២៣ វេលាម៉ោង ២ និង ៣០ នាទីរសៀល ក្រុមជំនាញបច្ចេកទេស នៃមន្ទីរសាធារណការ និងដឹកជញ្ជូនខេត្តបាត់ដំបង និងក្រុមអនាម័យ បានជីកប៉ះក្បាលគ្រាប់ប្លោងធុនធ្ងន់មួយគ្រាប់ ដែលម្នាក់ៗស្ទើរលោះព្រលឹង។

ការប្រទះឃើញនេះ ស្ថិតនៅលើកំណាត់ផ្លូវលេខ ១០៧ ក្នុងក្រុមទី ៣ ភូមិបែកចានថ្មី សង្កាត់ព្រែកព្រះស្តេច ក្រុងបាត់ដំបង ដោយក្បាលគ្រាប់ ( UXO ) មានចំនួន ១ គ្រាប់ នៅក្នុងរណ្ដៅដី។

ក្រោយពេលពិនិត្យទើបដឹងថា ជាប្រភេទក្បាលគ្រាប់កាំភ្លើងប្លោង ទំហំ ១០៥ មិល្លីម៉ែត្រ (ជាប្រភេទគ្រាប់បែកចង្កោម) ដែលអាចបង្កឲ្យមនុស្សស្លាប់បាន រួចក៏បានធ្វើការប្រគល់ទៅអង្គភាព ស៊ីម៉ាក់ នៅមជ្ឈមណ្ឌលសកម្មភាពកម្ចាត់មីន កម្ពុជា (ខេត្តបាត់ដំបង) ដើម្បីចាត់ការទៅតាមជំនាញ៕

អត្ថបទ ៖ សោ និយមរ័ត្ន