កូនឈើដាំលំអរទ្រូងផ្លូវជាតិលេខ៣កំពុងងាប់បាត់បង់សោភ័ណភាព

កូនឈើដែលបានដាំសម្រាប់ជាការលំអរទ្រូងផ្លូវជាតិលេខ៣ នៅចំណុចខាងជើងផ្សារអង្គតាសោម ស្រុកត្រាំកក់ ខេត្តតាកែវ កំពុងរងការខូចខាត់បាត់បង់សោភ័ណភាពជាបណ្តើរៗមួយផ្នែកខ្លះ។

កូនឈើដាំលំអរទ្រូងផ្លូវដែលបច្ចុប្បន្ននេះ មានខ្លះងាប់រិចដល់ដី និងខ្លះទៀតទើបតែងាប់បញ្ចេញស្លឹកពណ៌លឿង ដូចស្រូវទុំ ត្រូវបានមហាជនធ្វើដំណើរឆ្លងកាត់លើកឡើងថា តើជាការទទួលខុសត្រូវរបស់ក្រុមហ៊ុនស្ថាបនាផ្លូវជាតិលេខ៣ អាជ្ញាធរស្រុកត្រាំកក់ ឬជំនាញពាក់ព័ន្ធណា ទើបបានជាបណ្តោយឲ្យកូនឈើដែលដាំទុកជាការលំអរទ្រូវផ្លូវងាប់ស្ទើរគ្រប់កន្លែងបែបនេះ? តើជំនាញពាក់ព័ន្ធ ពិសេសអាជ្ញាធរស្រុកត្រាំកក់មើលមិនឃើញ ឬមិនដែលជិះឆ្លងកាត់ផ្លូវជាតិនេះ?។ អ្វីដែលគួរឲ្យស្តាយ គឺត្រូវខាតបង់ថវិកាយ៉ាងច្រើន ដោយត្រូវដាំឡើងវិញជាច្រើនលើកច្រើនសារ ដាំដុះមិនបានប៉ុន្មានផង នឹងត្រូវស្លោកងាប់គ្មានសល់ព្រោះតែគ្មានអ្នកថែរក្សា។

មហាជនរំពឹងថា ជំនាញពាក់ព័ន្ធ ពិសេសអាជ្ញាធរស្រុក នឹងមិនទុកឲ្យមានកូនឈើ ស្មៅ ដែលដាំលំអរទ្រូវផ្លូវនេះ ងាប់បាត់បង់សោភ័ណភាពជាបន្តទៀតនោះទេ ព្រោះថា ផ្លូវមួយខ្សែនេះ មួយថ្ងៃៗមានភ្ញៀងជាតិ និងអន្តរជាតិ ធ្វើដំណើរទៅមកច្រើនណាស់ សង្ឃឹមជំនាញពាក់ព័ន្ធពួកគាត់ នឹងមិនទុកសម្រាប់ជាការបង្អួតភ្ញៀវទេសចរណ៍នោះទេ៕

អត្ថបទ៖ វីរៈ