ចាប់ផ្សឹកគ្រូសូត្រឆ្វេងវត្តទ្រព្យគរ បញ្ជូនឲ្យសមត្ថកិច្ច ក្រោយប្រើហិង្សាលើសាម​ណេរ១​អង្គបែកព្រះកេស

សាលាគណខេត្តកែវ បានធ្វើពិធីផ្សឹកភិក្ខុ នួន ឆានី ដែលជាគ្រូសូត្រឆ្វេងនៃវត្តទ្រព្យគរ បញ្ជូនឲ្យកម្លាំងសមត្ថកិច្ចស្រុកបាទីអនុវត្តតាមនិតិវិធីច្បាប់ ក្រោយប្រើអំពើហិង្សាលើសាមណេរ១អង្គ របួសបែកព្រះកេសឈាមស្រោចខ្លួន។

សាលាគណខេត្តកែវ បញ្ជាក់ថា ករណីហិង្សាដោយភិក្ខុ នួន ឆានី អាយុ៣២ឆ្នាំ ដែលប្រើអំពើហិង្សាលើសាមណេរ ដោយយកចានវាយលើសីស(ក្បាល)សាមណេរ បណ្ដាលឱ្យមានរបួស ដែលប្រព្រឹត្តនៅវេលាម៉ោង១១ថ្ងៃត្រង់ ថ្ងៃទី២៥ ខែមករា ឆ្នាំ២០២៣ ស្ថិតនៅវត្តទ្រព្យគរ ឃុំត្រពាំងសាប ស្រុកបាទី ខេត្តតាកែវ សាលាអនុគណស្រុកបាទី បានផ្សឹកភិក្ខុរូបនោះរួចរាល់ហើយ និងបានប្រគល់ជូនសមត្ថកិច្ចមូលដ្ឋាន ដោះស្រាយតាមនីតិវិធីច្បាប់បន្ត។

លោកវរសេនីយ៍ឯក ឆាយ កែវមន្នី អធិការ នៃអធិការដ្ឋាននគរបាលស្រុកបាទី បានប្រាប់ កម្ពុជាថ្មី នៅព្រឹកថ្ងៃទី២៦ ខែមករា នេះថា​ ករណីនេះជនបង្កបានបញ្ជូនមកដល់អធិការស្រុកបាទីហើយ ហើយកម្លាំងជំនាញកំពុងសួរនាំ និងចាត់ការតាមនិតិវិធីច្បាប់ តែលោកមិនបានបញ្ជាក់ពីមូលហេតុដែលនាំឲ្យកើតមានអំពើហិង្សានេះនោះទេ ដោយកម្លាំងជំនាញកំពុងធ្វើការលើរឿងនេះ។

បើតាមការលើកឡើងរបស់អាខោនហ្វេសប៊ុកឈ្មោះ ព្រះធម៌ Page បានសរសេរថា «នេះឬអប់រំប្រដៅ? ដោយព្រះភិក្ខុសង្ឃ នួន ឆាយនី ដែលជាសូត្រឆ្វេង នៃវត្តទ្រព្យគរ បានចាប់វាយបោចលោកកូននេននឹងចានវាយព្រះកេស ហើយប្រាប់ថា នេះជាការប្រៀនប្រដៅអប់រំ»៕