ស្លាប់ម្នាក់របួស ២ នាក់ ករណីគ្រោះថ្នាក់បើករថយន្តបុកបង្គោលភ្លើងលើកោះរ៉ុង

ស្ត្រីជនជាតិចិន ២ នាក់ រងរបួសធ្ងន់ស្រាល និងក្មេងប្រុសម្នាក់បានស្លាប់បាត់បង់ជីវិត បន្ទាប់ពីជួបហេតុការណ៍គ្រោះថ្នាក់បើករថយន្តបុកបង្គោលភ្លើង។

ករណីគ្រោះថ្នាក់ចរាចរណ៍នេះបានកើតមានឡើងនៅម៉ោង ១៦៖១០នាទី ល្ងាចថ្ងៃទី ០៥ ខែកុម្ភៈ ឆ្នាំ២០២៣ នៅចំណុចពយយាយម៉ៅលើផ្លូវបេតុង ស្ថិតក្នុង​ភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ​។

សមត្ថកិច្ចមូលដ្ឋានបាននិយាយថា គ្រោះថ្នាក់ចរាចរណ៍ដោយការធ្វេសប្រហែសនេះ បង្កឡើងដោយរថយន្ត ១គ្រឿង ម៉ាក UTV ពណ៍ខៀវ បេីកបរដោយស្ត្រីឈ្មោះ YAN BAIHUI អាយុ៣៤ឆ្នាំ ជនជាតិចិន រួមដំណើរដោយឈ្មោះ LIU CHUNQING អាយុ៦០ឆ្នំា ជនជាតិចិន រងរបួស។ និងក្មេងប្រុសតូចឈ្មោះ CHE YUTAI អាយុ១៨ខែ (ស្លាប់)។

សមត្ថកិច្ចបានឲ្យដឹងថាមុនពេលកើតហេតុរថយន្តបានបើកបរចេញពីភូមិសុខសាន្ត ឆ្ពោះទៅភូមិកោះតូចនៅលើផ្លូវបេតុង លុះមកដល់ចំណុចកើតហេតុខាងលើបានរ៉េចង្កូតទៅស្ដាំបុក និងបង្គោលភ្លើងសូឡាបំភ្លឺផ្លូវបណ្ដាលអោយខូចខាតរថយន្តផ្នែកខាងមុខនិងវៀចបង្គោលភ្លើង១ដើម។

បច្ចុប្បន្នរថយន្តបង្កហេតុសមត្ថកិច្ចបានអូសយកទៅរក្សាទុក្ខនៅអធិការនគរបាលក្រុងកោះរ៉ុងរងចាំដោះស្រាយតាមក្រោយ៕

ស៊ុយ ចាន់ធា