ឆេះផ្ទះមួយខ្នងស្លាប់មនុស្ស៣នាក់ និងរបួស២​នាក់ នៅស្រុកកងមាស

យ៉ាងហោចណាស់មានមនុស្ស៣នាក់បានស្លាប់ និង២នាក់រងរបួសដោយគ្រោះអគ្គិភ័យអស់ផ្ទះមួយខ្នង នៅថ្ងៃទី០៧ ខែកុម្ភៈ ឆ្នាំ២០២៣ វេលាម៉ោង៤និង៤៥នាទីព្រឹក នៅចំណុចភូមិអង្គរបាន ឃុំអង្គរបាន ស្រុកកងមាស ខេត្តកំពង់ចាម។

បើតាមសមត្ថកិច្ចប៉ុស្តិ៍នគរបាលរដ្ឋបាលឃុំអង្គរបាន បានឲ្យដឹងថា នៅវេលាកើតហេតុសមត្ថកិច្ចបានទទួលព័ត៌មានពីប្រជាពលរដ្ឋរាយការណ៍ថា មានករណីនៅចំណុចដូចខាងលើ ។ ក្រោយពីទទួលព័ត៌មានភ្លាមកម្លាំងអធិការដ្ឋាននគរបាលកងមាស បានសហការជាមួយកម្លាំងប៉ុស្តិ៍នគរបាលរដ្ឋបាលអង្គរ ចុះជួយពន្លត់ម្ចាស់ផ្ទះ ឈ្មោះ យ៉ា អ៊ែល ភេទប្រុស អាយុ៥៦ឆ្នាំ នៅភូមិឃុំខាងលើ។

សមត្ថកិច្ចឲ្យដឹងទៀតថា ករណីនេះបណ្តាលអោយស្លាប់មនុស្ស៣នាក់ ប្រុស១នាក់ និងរងរបួសមនុស្ស២នាក់ ស្រី១ នាក់ បញ្ជូនទៅសង្គ្រោះនៅមន្ទីរពេទ្យ។

ប្រភពពីប្រជាពលរដ្ឋបានឲ្យដឹងថា ករណីខាងលើនោះមានការខូចខាតផ្ទះសង់អំពីឈើ ដំបូលប្រក់ក្បឿង រៀបបន្ទប់សង្ក័សីក្រោមទំហំ (៦មែត្រ ×៨ម៉ែត្រ) ឆេះអស់ទាំងស្រុង ។

ជាមួយគ្នានោះដែរ សមត្ថកិច្ចបានអន្តរាគមន៍ពន្លត់អគ្គិភ័យរលត់អស់១០០% នៅវេលាម៉ោង៦និង៣០នាទីព្រឹក ដោយក្នុងកិច្ចប្រតិបត្តិការនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន០៤គ្រឿង និងប្រើប្រាស់អស់ទឹក០៦រថយន្ត ក្នុងនោះរថយន្តពន្លត់អគ្គិភ័យខេត្ត២គ្រឿង ស្រុកព្រៃឈរ ១គ្រឿង ស្រុកកងមាស ១គ្រឿង ។ មូលហេតុនៃករណីខាងលើ សមត្ថកិច្ចជំនាញកំពុងធ្វើការស្រាវជ្រាវ ៕

អត្ថបទ៖ ឡេក ចាន់ពេជ្រ