កម្មករម្នាក់​រអិលធ្លាក់ពីដងសន្ទូច​អំឡុងពេលរុះរើកាស៊ីណូហ្គ្រេនដាយមិនស៊ីធី​

បុរសកម្មករសំណង់ម្នាក់បានរងរបួសធ្ងន់ បន្ទាប់ពីដាច់ខ្សែកាបគ្រឿងចក្រស្ទូចដែកនៅការដ្ឋានរុះរើអាគារឆេះកាស៊ីណូហ្គ្រេនដាយមិនស៊ីធី កាលពីថ្ងៃទី ៧ ខែកុម្ភៈ ឆ្នាំ ២០២៣ នៅច្រកអន្តរជាតិប៉ោយប៉ែត។

ជនរងគ្រោះមានឈ្មោះ ឈួយ អាយុ ៣០ឆ្នាំ រងរបួសធ្ងន់ ហើយត្រូវបានក្រុមជាងដូចគ្នាបានបញ្ជូនទៅព្យាបាលនៅមន្ទីរពេទ្យបង្អែកក្រុងប៉ោយប៉ែត តែដោយស្ថានភាពធ្ងន់ធ្ងរជនរងគ្រោះត្រូវបានគេបញ្ជូនបន្តទៅសងគ្រោះនៅមន្ទីរពេទ្យមិត្តភាពកម្ពុជា-ជប៉ុន ស្រុកមង្គលបុរី។ លុះដល់ថ្ងៃទី ០៨ ខែកម្ភៈ ឆ្នាំ២០២៣ ប្រភពព័ត៌មានខ្លះបានបង្ហើបថា ជនរងគ្រោះបានស្លាប់បាត់បង់ជីវិតហើយ។

តែបើតាមលោកវិជ្ជៈបណ្ឌិត ទុ បារាំង ប្រធានមន្ទីរពេទ្យបង្អែកមិត្តភាពកម្ពុជា-ជប៉ុន ស្រុកមង្គលបូរីបានឱ្យដឹងកាលពីរសៀលថ្ងៃទី៨នេះថា មិនទាន់មានអ្នកជំងឺដែលបញ្ជូនមកបានស្លាប់ទេតែមានមួយករណីដែលត្រូវបញ្ជូនចេញតែមិនដឹងថាជាជនរងគ្រោះខាងលើ ឬអត់ដោយសារលោកជាប់រវល់៕

អត្ថបទ៖ អពៅ