Update៖ រកឃើញសាកសពកូនស្រី និងចៅក្នុងហេតុការណ៍លិចទូកនៅទន្លេមេគង្គ

ក្រោមការខិតខំប្រឹងប្រែងរបស់កម្លាំងនគរបាល និងអាវុធហត្ថ ជនរងគ្រោះចំនួន ៤ នាក់ដែលបានលិចទូកក្នុងដងទន្លេមេគង្គបន្ទាប់ពីរកឃើញឪពុក ពេលនេះបានរកឃើញកូនស្រី និងចៅម្នាក់ទៀតហើយនៅព្រឹកថ្ងៃទី ១៦ ខែកុម្ភៈ ឆ្នាំ ២០២៣។ នៅសល់តែចៅប្រុសម្នាក់ទៀតទេ នៅមិនទាន់រកឃើញនៅឡើយ។

កាលពីព្រឹកថ្ងៃទី ១៤ ខែកុម្ភៈជនរងគ្រោះមួយគ្រួសារមានគ្នាចំនួន ៨ នាក់បានលិចទូកបាត់ខ្លួនចំនួនបួននាក់មានឪពុកកូនស្រីបង្កើតម្នាក់ និងចៅពីរនាក់នៅចំណុចដងទន្លេមេគង្គកន្ទុយកោះហាន ស្ថិតក្នុងភូមិខាំផាន់ សង្កាត់សាមគ្គី ក្រុង ខេត្តស្ទឹងត្រែង។

លោក អ៊ុង សុភ័ក្រ្ត មេប៉ុស្តិ៍សង្កាត់សាមគ្គីបានឲ្យដឹងថា ជនរងគ្រោះដែលបានបាត់ខ្លួន ឈ្មោះ សុត មី ភេទប្រុសអាយុ៥៦ឆ្នាំ ជាឪពុកបានរកឃើញនៅរសៀលថ្ងៃទី ១៥ ខែកុម្ភៈនេះដោយឡែកកូន ឈ្មោះ ម៉ី សុគ្រី ភេទស្រី អាយុ​២៥ឆ្នាំ ឈ្មោះ លូយ ចន្ទ្រា ភេទប្រុស អាយុ៨ឆ្នាំ (ត្រូវជាចៅ) បានរកឃើញហើយនៅព្រឹកថ្ងៃទី ១៦ កុម្ភៈនេះ នៅតែចៅប្រុស, ឈ្មោះ លួយ ហាត់ ភេទប្រុស អាយុ៦ឆ្នាំ (ត្រូវជាចៅប្រុស) ម្នាក់ប៉ុណ្ណោះមិនទាន់រកឃើញ។

លោកមេប៉ុស្តិ៍បានបន្តឲ្យដឹងទៀតថា ជនរងគ្រោះឪពុកកូនស្រីរួមទាំងចៅពីរនាក់មានទីលំនៅភូមិកោះកី ឃុំកោះស្នែង ស្រុកបុរីអូស្វាយសែនជ័យខេត្តស្ទឹងត្រែង គ្រួសារនេះមានប្រាំបីនាក់ជិះទូកក្នុងគោលបំណងទៅធ្វើកម្មករលីឥដ្ឋតែក៏ត្រូវជួបហេតុការណ៍ដ៏រន្ធត់នេះត្រូវបានទឹកគួចលិចទូកបណ្ដាលឲ្យបាត់សមាជិកគ្រួសារអស់ចំនួន ៤ នាក់បួននាក់ត្រូវបានសង្គ្រោះទាន់ពេលវេលា។

បើតាមការឲ្យដឹងពីលោក អ៊ុង សុភ័ក្រ្ត មេប៉ុស្តិ៍សង្កាត់សាមគ្គីនៅព្រឹកថ្ងៃទី ១៦ កុម្ភៈនេះ លោក ស្វាយ សំអ៊ាង អភិបាលខេត្តស្ទឹងត្រែង នឹងពាំនាំនៅអំណោយ និងថវិកាមួយចំនួនផ្ដល់ជូនក្រុមគ្រួសាររងគ្រោះដើម្បីដោះស្រាយទុក្ខលំបាកដល់ក្រុមគ្រួសារជនរងគ្រោះដោយសារលេចទូក។

នៅថ្ងៃទី ១៦ កុម្ភៈនេះ កម្លាំងស្នងការដ្ឋាននគរបាលខេត្តរួមជាមួយកម្លាំកងរាជអាវុធហត្ថខេត្តបានខិតខំរុករកនោះ បន្ទាប់ពីរឃើញឪពុកនៅព្រឹកនេះបានរកឃើញកូនស្រី និងចៅស្រីម្នាក់ទៀតហើយនៅសល់តែចៅប្រុសម្នាក់ទៀតតែប៉ុណ្ណោះ ពេលនេះសមត្ថកិច្ចនៅតែបន្តរុករកនៅឡើយ៕

អត្ថបទ៖ ងិនលីម