អគ្គិភ័យឆេះផ្ទះដេរពូក សាឡុង អស់ទាំងស្រុង

ផ្ទះដេរពូក សាឡុង ស្តុកពូក មួយកន្លែងស្ថិតនៅតាមផ្លូវលំ ក្រុម៤ ភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ ត្រូវបានអគ្គិភ័យឆាបឆេះយ៉ាងសន្ធោសន្ធៅរងការខូចខាតអស់ទាំងស្រុង បង្កការភ្ញាក់ផ្អេីលកាលពីវេលាម៉ោង៦​និង២០​នាទី​ព្រឹក ថ្ងៃទី២៣ ខែកុម្ភៈ ឆ្នាំ២០២៣ ខណៈដែលម្ចាស់មិននៅផ្ទះចាក់សោទុកចោល។

ម្ចាស់ផ្ទះរងគ្រោះឈ្មោះ សៀង ធារិទ្ធ ភេទប្រុស អាយុ៣៩ឆ្នាំ មុខរបរដេរពូក សាឡុងលក់ មានទីលំនៅផ្ទះមួយកន្លែងទៀត ក្នុងភូមិខាងលើដែរ ។ ផ្ទះកើតហេតុសាងសង់អំពីថ្ម ប្រក់ស័ង្កសី ទំហំទទឹង៤ម៉ែត្រ បណ្តោយ១៦ម៉ែត្រ ដេរ លក់ ស្តុកពូក និងសាឡុង ។

តាមសម្តីជនរងគ្រោះបានឲ្យដឹងថា ផ្ទះខាងលើជាកន្លែងដេរ លក់ ស្តុក ពូក សាឡុង ពេលយប់ឡើងចាក់សោទុកចោលដោយគាត់ទៅសម្រាកនៅផ្ទះមួយកន្លែងទៀត ស្ថិតនៅក្នុងភូមិនោះដែរ ស្រាប់តែនៅព្រឹកថ្ងៃនេះ ពលរដ្ឋក្បែរខាងទូរស័ព្ទប្រាប់រត់មកមើលភ្លើងឆេះសន្ធោសន្ធៅបាត់ទៅហើយ ។

បើតាមប្រជាពលរដ្ឋផ្ទះក្បែរនោះបានឲ្យដឹងថា ខណៈដែលម្ចាស់ចាក់សោផ្ទះទុកចោល មិនទាន់បានទៅបើកទ្វារផង ស្រាប់តែទុស្សេខ្សែភ្លើងចេញពីផ្នែកខាងមុខ ក្នុងផ្ទះ ផ្សែងខ្មួលឡើងចេញជាអណ្តាតភ្លើងឆាបឆេះកាន់តែខ្លាំងឡើង ផ្អើលអ្នកភូមិនាំគ្នាវាយគាស់ទ្វារចូលបាញ់ទឹក យកបំពង់ពន្លត់អគ្គិភ័យបាញ់តែមិនទប់ទល់បានរហូតដល់ឆេះអស់ទាំងស្រុង បាក់ស្រុតដំបូលខ្ទេចអស់ទ្រព្យសម្បត្តិខាងក្នុង ។

គ្រោះអគ្គិភ័យខាងលើ ត្រូវបានបងប្អូនប្រជាពលរដ្ឋ អាជ្ញាធរសមត្ថកិច្ចប្រើរថយន្តពន្លត់អគ្គិភ័យចំនួន៦គ្រឿង ចេញទៅអន្តាគមន៍ និងមិនបានរាលដាលដល់ផ្ទះអ្នកជិតខាងនោះទេ ៕

អត្ថបទ៖ សុខា