សន្តិសុខសង្គម

សម្លាប់កូនអាយុ ៤ ឆ្នាំ រួចចង.ក សម្លាប់ខ្លួនឯងតាមក្រោយ

បានផុស

២ years មុន

នៅ

ថ្ងៃអាទិត្យ ៥ មីនា ២០២៣

ដោយ

មានការភ្ញាក់ផ្អើលមួយបានកើតឡើងនៅកណ្ដាលក្រុងពោធិ៍សាត់ ដោយករណីឃាតកម្ម ដែលឃាតកជាឪពុកបង្កើតចាប់ជនរងគ្រោះជាកូនចងដៃទៅក្រោយ ហើយធ្វើអត្តឃាតចង.ក ជាមួយនឹងកូនខ្លួនឯង បណ្ដាលឲ្យស្លាប់ទាំងពីរ ហើយមានបណ្ដាំសំបុត្រទុកឲ្យមើល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍ខាងលើនេះបានកើតឡើងកាលពីវេលាម៉ោង ១០ និង ៣០ នាទីព្រឹក ថ្ងៃទី ០៤ ខែមីនា ឆ្នាំ ២០២៣ ស្ថិតក្នុងភូមិដង្គារ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់។

បើតាមលោកវរសេនីយ៍ឯក មាស សំណាង នាយការិយាល័យនគរបាលផ្នែកបច្ចេកទេសវិទ្យាសាស្ត្របានឲ្យដឹងថា លោកបានទទួលព័ត៌មានពីប៉ុស្តិ៍មូលដ្ឋាន មានករណីអត្តឃាតចង.ក សម្លាប់ខ្លួនពីរនាក់ឪពុក និងកូន នៅចម្រឹងបង្អួចរបស់ខ្លួន បណ្ដាលឲ្យស្លាប់ បង្កការភ្ញាក់ផ្អើលក្នុងក្រុង។ ភ្លាមៗនោះ លោកបាននាំកម្លាំងជំនាញសហការជាមួយអាជ្ញាធរមូលដ្ឋាន និងគ្រូពេទ្យជំនាញកោសល្យវិច័យខេត្តពោធិ៍សាត់ និងការបំភ្លឺជុំវិញរឿងហេតុ សន្និដ្ឋានបានថា ជនរងគ្រោះឈ្មោះ ហុង ចំរើន ភេទប្រុស អាយុ ៣៥ ឆ្នាំ រស់នៅភូមិ-សង្កាត់កើតហេតុខាងលើ(ស្លាប់) បណ្ដាលមកពីធ្វើអត្តឃាត(ចង.ក សម្លាប់ខ្លួន) ពិតប្រាកដមែន។ ចំណែកកុមារារងគ្រោះឈ្មោះ ច រ ប ញ អាយុ ៤ ឆ្នាំ ភេទប្រុស អាចស្លាប់បណ្ដាលមកពីថប់ដង្ហើម ដោយឪពុកជាឃាតកបានចាប់កូន ហើយយកខ្សែភ្លើងទៅចងដៃទាំង ២ ចង.ក។ នេះជាករណីឃាតកម្ម ហើយសាកសពទាំងពីរខាងលើស្លាប់លើសពី០៣ ម៉ោងឡើង។

លោក មាស សំណាង បញ្ជាក់ថា តាមសំដីរបស់ប្រពន្ធជនរងគ្រោះឈ្មោះ ចៅ ដារី អាយុ ៣៦ ឆ្នាំ ដែលនៅក្នុងបន្ទុកជាមួយគ្នាថា ជនរងគ្រោះមានជំងឺខូចក្រលៀនជិតមួយឆ្នាំហើយ។ គ្រូពេទ្យប្រាប់ថា ត្រូវព្យាបាលលាងក្រលៀនមួយអាទិត្យ ២ ដង តែគាត់អត់លុយ ក៏គិតខ្លីសម្លាប់ខ្លួន ហើយយកទាំងកូនប្រុសស្លាប់ទៅជាមួយ ព្រមទាំងសរសេរសំបុត្រទុកឲ្យមុនអត្តឃាតកូន និងខ្លួនគាត់៕

អត្ថបទ ៖ លាន គ្រន