សន្តិសុខសង្គម

ពលរដ្ឋ ស្នើអភិបាលខេត្តអន្តរាគមន៍ដោះស្រាយបញ្ហាក្លិនសំរាមក្នុងក្រុងដូនកែវ

បានផុស

២ years មុន

នៅ

ថ្ងៃសុក្រ ២៤ មីនា ២០២៣

ដោយ

ខេត្តតាកែវ ៖ ពលរដ្ឋរស់នៅក្នុងក្រុងដូនកែវ ខេត្តតាកែវ បានលើកឡើងថា ក្រុងដូនកែវស្ទើរទាំងមូល បានគ្របដណ្ដប់ទៅដោយក្លិន និងផ្សែងហុយបណ្តាលមកពីការដុតសំរាម ទាំងយប់ទាំងថ្ងៃ ដោយពួកគេប្រាប់ថាពិបាករស់នៅរាប់ខែ រាប់ឆ្នាំមកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងរឿងរ៉ាវនេះ ប្រជាពលរដ្ឋ រួមទាំងតាអាចារ្យ ព្រះសង្ឃ និងមេភូមិផងនោះ បានផ្ដិតមេដៃស្នើទៅអភិបាលខេត្តតាកែវ ដើម្បីឲ្យជួយរកដំណោះស្រាយលើបញ្ហានេះ។

បើតាមប្រភពពីប្រជាពលរដ្ឋលើកឡើងថា ទីតាំងចោលសំរាមនេះ គឺនៅក្បែរវត្តអមរា ដែលស្ថិតនៅភូមិស្នោ សង្កាត់រកាក្រៅ ក្រុងដូនកែវ ខេត្តតាកែវ ត្រូវបានគេយកកាកសំណល់ផ្សេងៗ ពីមន្ទីរពេទ្យ អាហារដ្ឋាន និងយកពីទីតាំងដទៃទៀត ក្នុងក្រុងដូនកែវ មកចោលទីនេះ។ លើសពីនេះទៅទៀត ក្លិនស្អុយឆ្អេះ ឆ្អាប សាយភាយពីទីតាំងចោលសំរាមនេះរាល់ថ្ងៃ រាប់ឆ្នាំមកហើយ លុះដល់ពេលយប់មានអ្នកទៅលួចដុតសំរាមចោលឆេះហុយផ្សែងទ្រលោមពេញមេឃ។

ជាមួយគ្នានេះ ប្រជាពលរដ្ឋដែលកំពុងប្រឈមផលប៉ះពាល់ពីទីតាំងចោលសំរាមខាងលើ បានធ្វើការស្នើសុំទៅមន្ត្រីជំនាញពាក់ព័ន្ធ ក៏ដូចជាអភិបាលខេត្តតាកែវ ធ្វើយ៉ាងណាជួយដោះស្រាយបញ្ហានេះ ដើម្បីកុំឲ្យក្រុងដូនកែវ គ្របដណ្ដប់ទៅដោយផ្សែងដុតសំរាមហុយពេញមេឃដូចរាល់ថ្ងៃនេះតទៅទៀត៕

អត្ថបទ៖ វីរៈ