ពលរដ្ឋគួរប្រុងប្រយ័ត្នបែបណាខ្លះ ដើម្បីការពារទ្រព្យសម្បត្តិក្នុងផ្ទះ អំឡុងពេលពិធីបុណ្យចូលឆ្នាំថ្មី!

នាយកដ្ឋានកណ្តាលសន្តិសុខ នៃអគ្គស្នងការដ្ឋាននគរបាលជាតិ បានក្រើនរំលឹកដល់ប្រជាពលរដ្ឋគ្រប់រូប ត្រូវបង្កើនការប្រុងប្រយ័ត្នការពារទ្រព្យសម្បត្តិ ផ្ទះសំបែង និងចូលរួមបង្ការទប់ស្កាត់ សក​ម្មភាពក្រុមជនល្មើសគាស់ទម្លុះទម្លាយចូលលួចសម្ភារៈ នៅក្នុងអំឡុងពេលនៃពិធីបុណ្យចូលឆ្នាំថ្មីប្រពៃណីខ្មែរ ដែលប្រជាពលរដ្ឋភាគច្រើននឹងធ្វើដំណើរទៅកាន់ស្រុកកំណើត និងទៅកម្សាន្តតាមរមណីយដ្ឋាននានា​។ នាយកដ្ឋានកណ្តាលសន្តិសុខ ក្រើនរំលឹកនូវចំណុចមួយចំនួន ដូចខាងក្រោម៖

១. ចំពោះបងប្អូនដែលបំពេញការងារជាបុគ្គលិកសន្តិសុខឯកជនទាំងអស់ ជាពិសេសបងប្អូនដែលឈរជើងនៅតាមគោលដៅបុរី ឬលំនៅដ្ឋាននានា សូមមានការយកចិត្តទុកដាក់ខ្ពស់ កត់សម្គាល់លើបណ្ដាយានជំនិះទាំងឡាយ ដែលមិនធ្លាប់ស្គាល់ភិនភាគអត្តសញ្ញាណ មានវត្តមានឆ្លងកាត់ចូលទីតាំងរបស់ខ្លួន។

២. ចំពោះពលរដ្ឋដែលមានគម្រោងដើរកម្សាន្ត​នៅទីកន្លែងឆ្ងាយពីលំនៅដ្ឋាន សូមធ្វើការផ្ទៀងផ្ទាត់​ ដាក់គន្លឹះទ្វារ-បង្អួច​ និងចាក់សោរទ្វារឲ្យបានគ្រប់ជ្រុងជ្រោយ ច្បាស់លាស់ មុននឹងចាកចេញពីផ្ទះសំបែង។

៣. ចំពោះពលរដ្ឋដែលស្នាក់នៅផ្ទះមិនមានដំណើរកម្សាន្ត សូមជួយសហការក្រោមស្មារតីជាពលរដ្ឋល្អ​ ផ្ដល់ព័ត៌មានដល់អាជ្ញាធរមានសមត្ថកិច្ច ក្នុងករណីប្រទះឃើញសកម្មភាពសង្ស័យលើលំនៅដ្ឋាន ឬទីតាំងរបស់អ្នកជិតខាងណាមួយ ដូចជា៖

-ការជិះក្រវែលដោយជនមិនស្គាល់អត្តសញ្ញាណ

-ឃើញសកម្មភាព ឬលឺសំឡេង ឆ្កឹះឆ្កៀល វាយដំ ឬអាកាត់សោរទ្វារ

-មានការរើជញ្ជូនឥវ៉ាន់មិនប្រក្រតីចេញពីទីតាំង ក្នុងលក្ខណ:លួចលាក់​ បិទបាំងសាធារណៈជន

-ឃើញវត្តមានបុគ្គលគួរឲ្យសង្ស័យ ដែលតែងតែពាក់ម៉ាស់ និងមួក ឬវ៉ែនតាខ្មៅ ដើម្បីបិទបាំងអត្តសញ្ញាណ។ល។

៤. បង្កើនភាពជិតស្និទ្ធ​ ការប្រាស្រ័យទាក់ទងរវាងអ្នកជិតខាង​ ភូមិផងរបងជាមួយ​ ដើម្បីមនសិការ​ជួយយកអាសាគ្នាទៅវិញទៅមក៕