ស្នងការរាជធានីកោះហៅអ្នកកាក់រថយន្ដយកលុយនៅក្រោមស្ពានអាកាសស្ទឹងមានជ័យមកអប់រំ

បន្ទាប់ពីមានការចែករំលែកនូវវីដេអូពីសកម្មភាពរបស់បុរសស្លៀកពាក់ស៊ីវិលម្នាក់កាន់ដំបងបញ្ជាចរាចរណ៍កាក់រថយន្ដដឹកទំនិញយកលុយនៅក្រោមស្ពានអាកាសស្ទឹងមានជ័យកាលពីវេលាម៉ោង១០:២២នាទីយប់ ថ្ងៃទី១២ ខែមេសា​នោះមក នៅថ្ងៃទី១៨ ខែមេសា នេះ ស្នងការនគរបាលរាជធានីភ្នំពេញ បានកោះហៅបុរសរូបនេះមកអប់រំណែនាំ និងធ្វើកិច្ចសន្យា។

តាមការស្រាយបំភ្លឺរបស់ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញបានឲ្យដឹងថា តាមការបញ្ជាក់របស់បុរសម្នាក់នេះ កាលពីថ្ងៃទី១២ ខែមេសា ឆ្នាំ២០២៣ វេលាម៉ោង១០និង២២ នាទីយប់ នៅចំណុចក្រោមស្ពានអាកាសស្ទឹងមានជ័យតាមបណ្តាយផ្លូវមុន្នីរ៉េត ដោយឃើញសភាពស្ងាត់ មិនមានសមត្ថកិច្ចនៅគោលដៅ ម្យ៉ាងទៀតរត់ម៉ូតូមិនមានភ្ញៀវសោះរហូតដល់កណ្តាលយប់ ទើបគាត់ក៏ឆ្លៀតឱកាសចេញមកជាមួយដំបងបំភ្លឺផ្លូវ ដើម្បីហៅរថយន្តខ្លះគ្រាន់បានថវិកាបន្តិចបន្តួចដើម្បីផ្ញើជូនទៅម្តាយចាស់ជារាដែលមានអាយុ៨៤ឆ្នាំ នៅឯខេត្តមុនចូលឆ្នាំ។

បុរសម្នាក់រូបនោះបានសារភាពទទួលកំហុស ហើយបានបញ្ជាក់ថា មិនមានបំណងណាមួយបន្លំជាសមត្ថកិច្ចនោះទេ ជាមួយនោះដែរគាត់បានធ្វើការសុំទោសជាសារណ:ចំពោះបងប្អូនប្រជាពលរដ្ឋ មន្ត្រីសមត្ថកិច្ចអនុវត្តច្បាប់ ចំពោះកំហុសខុសឆ្គងនេះ ។ ការចេញយកលុយឡាននេះ មិនមានពាក់ព័ន្ធជាមួយមន្ត្រីគោលដៅឡើយ គាត់ធ្វើដោយខ្លួនឯង ដោយសារតែមិនមានភ្ញៀវដឹក ម្យ៉ាងទៀតខ្វះខាតផ្នែកជីវភាព និងចង់បានថវិកាខ្លះផ្ញើជូនម្តាយចាស់មុនចូលឆ្នាំ៕

អត្ថបទ៖ សុខុម