ស្នងការរាជធានី ឆ្លើយតបផេកហ្វេសបុកឈ្មោះ Pey pey ly ដែលបង្ហោះករណីគ្រោះថ្នាក់ចរាចរណ៍​ថា ជាការប៉ុនប៉ងមនុស្សឃាត

ស្នងការដ្ឋាននគរបាលរាជធានីភ្នំពេញ បានចេញសេចក្តីបកស្រាយបំភ្លឺ និងបដិសេធចំពោះការបង្ហោះព័ត៌មានរបស់ផេកហ្វេសបុកឈ្មោះ Pey pey ly (Peypey ly) ដែលនិយាយបំភ្លើសខុសពីការពិត ក្នុងករណីគ្រោះថ្នាក់ចរាចរណ៍តែបែជាថាជាការប៉ុនប៉ងមនុស្សឃាតទៅវិញ។

យោងតាមក្រុមការងារព័ត៌មាន​ និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានឲ្យដឹងនៅថ្ងៃទី២៤ ខែមេសា នេះថា ផេកហ្វេសបុកឈ្មោះ Pey pey ly (Peypey ly) និយាយបំភ្លើសខុសពីការពិត បំពុលបរិយាកាសសង្គម ជាករណីគ្រោះថ្នាក់ចរាចរណ៍ដោយការបើកបរខ្វះការប្រុងប្រយ័ត្ន បែរជានិយាយថា ជាករណីប៉ុនប៉ងមនុស្សឃាតទៅវិញ ដែលធ្វើឲ្យប៉ះពាល់យ៉ាងធ្ងន់ធ្ងរដល់សន្តិសុខសង្គម។ បន្ទាប់ពីកើតហេតុភ្លាមៗ មន្ត្រីជំនាញនគរបាលចរាចរណ៍ផ្លូវគោក បានចុះធ្វើការត្រួតពិនិត្យនៅកន្លែងកើតហេតុ និងបានធ្វើការវាស់វែងតាមជំនាញ បញ្ជាក់ថា ជាករណីគ្រោះថ្នាក់​ចរាចរណ៍ មិនមែនជាករណីប៉ុនប៉ងមនុស្សឃាតដូចការបង្ហោះវីដេអូឡាយរបស់ផេកហ្វេសបុករបស់ឈ្មោះ ធី សុខា ហៅ ប៉ីប៉ីលី នោះឡើយ។

សូមបញ្ជាក់ថា កាលពីថ្ងៃទី២១ ខែមេសា ឆ្នា២០២៣ វេលាម៉ោង២០និង២០នាទី មានករណីគ្រោះថ្នាក់ចរាចរណ៍មួយកើតឡើងរវាងរថយន្ត និងរថយន្ត ត្រង់ចំណុចខាងកើតសាលាសង្កាត់រលួស លើផ្លូវ១០៤ ស្ថិតក្នុងភូមិក្រពើទ្រោម សង្កាត់រលួស ខណ្ឌដង្កោ រាជធានីភ្នំពេញ បណ្ដាលឲ្យមនុស្សម្នាក់រងរបួស និងបណ្តាលឲ្យខូចខាតសម្ភារៈធ្ងន់ធ្ងរ (រថយន្តទាំង២)៕