ស្នងកាខេត្តព្រៃវែងប្រត្តិកម្មលើបណ្ដាញសារព័ត៌មាន​មួយចំនួនដែលចុះផ្សាយថា មានករណី​គប់កញ្ចក់រថយន្ដបណ្ដាលឲ្យតៃកុងរថយន្ដស្លាប់

លោកឧត្ដមសេនីយ៍ទោ ឈឿន ប៊ុនឆន ស្នងការនៃស្នងការដ្ឋាននគរបាលខេត្តព្រៃវែង នៅព្រឹកថ្ងៃទី២៩ ខែមេសា នេះបានបង្ហោះសារប្រត្តិកម្មមួយបន្ទាប់ពីមានបណ្ដាញសារព័ត៌មានមួយចំនួនចុះផ្សាយពីករណីគ្រោះថ្នាក់ចរាចរណ៍ថាជាករណីគប់កញ្ចក់រថយន្ដបណ្ដាលឲ្យរ៉េចង្កូតធ្លាក់ប្រឡាយស្លាប់អ្នកបើកបរ។

ក្នុងសំណេរប្រត្តិកម្មនេះ លោកស្នងការនគរបាលខេត្តព្រៃវែងបានលើកឡើង មានករណីគ្រោះថ្នាក់ចរាចរណ៍នៅផ្លូវជាតិលេខ១ ចំណុចកំពង់សឹង ស្រុកព្រះស្តេច ខេត្តព្រៃវែង ជនរងគ្រោះជាតៃតុងឡានស្លាប់ ។ បងៗអ្នកសារព័ត៌មានផ្សាយថា មានជនពាលគប់កញ្ចក់ឡានទើបបណ្តាលឱ្យមានគ្រោះថ្នាក់បែបនេះ។ ប៉ុន្តែសមត្ថកិច្ចមូលដ្ឋានរាយការណ៍តាំងពីកើតហេតុភ្លាមៗថា គ្រោះថ្នាក់ដោយឯងៗ យ៉ាងណាក៏​ដោយខ្ញុំ​បានចាត់បញ្ជូនជំនាញចុះស្រាវអង្កេតដោយយកចិត្តទុកដាក់ជាទីបំផុតតាំងពីព្រឹកព្រលឹម ដូចនេះសុំបណ្តាសារព័ត៌មានផ្សាយដោយយកចិត្តទុកដាក់ បើមានភស្តុតាងពិតជាមានការគប់កញ្ចក់រថយន្តមែន សូមផ្សាយឱ្យបានភ្លូកទឹកភ្លូកដីចុះ ប៉ុន្តែបើមិនទាន់មានភស្តុតាងទេ ការផ្សាយចេញបែបនេះគឺប៉ះពាល់ក៏ធ្ងន់ធ្ងរដែរដល់សមត្ថកិច្ចមូលដ្ឋាន។

សូមបញ្ជាក់ថា ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោងជាង១រំលងអាធ្រាត្រ ឈានចូលថ្ងៃទី២៩ ខែមេសា ឆ្នាំ២០២៣ នៅតាមបណ្ដោយផ្លូវជាតិលេខ១ ចំណុចកំពង់សឹង ស្រុកព្រះស្តេច ខេត្តព្រៃវែង។ បើតាមព័ត៌មានពីកន្លែងកើតហេតុ តៃកុងរថយន្ដអាចទំនងជាងងុយដេក ទើបរ៉េចង្កូតធ្លាក់ចូលប្រឡាយបណ្ដាលឲ្យស្លាប់៕

អត្ថបទ៖​ សុខុម