បើកត្រាក់ទ័រភ្ជួរដីចម្ការជាន់មីនផ្ទុះស្លាប់ភ្លាមៗ

បុរសម្នាក់បានស្លាប់ក្នុងហេតុការណ៍ផ្ទុះមីន​នៅក្នុងដីចម្ការ ខណៈកំពុងភ្ជួរដីដើម្បីដាំពោត។ ហេតុការនេះកើតឡើងកាលពីថ្ងៃទី៩ ខែឧសភា ឆ្នាំ២០២៣ វេលាម៉ោង១២និង១០នាទី នៅចំណុចផ្ទះអូរត្រាង ស្ថិតក្នុងភូមិឈើទាល ឃុំសិរីមានជ័យ ស្រុកសំពៅលូន ខេត្តបាត់ដំបង។

ជនរងគ្រោះឈ្មោះ ង៉ែត ណារ៉ុង ភេទប្រុស អាយុ៣៥ឆ្នាំ រស់នៅភូមិពោជ្រៃ ឃុំសិរីមាជ័យ ស្រុកសំពៅលូន ខេត្តបាត់ដំបង។ បានបាត់បង់ជីវិត ខណៈកំពុងបើកត្រាក់ទ័រភ្ជួរដីដាំពោត និងត្រាក់ទ័រ១គ្រៀងខូចខាតទាំងស្រុង ដោយប្រភពពីកន្លែងកើតហេតុបានបញ្ជាក់ថា ចំណុចផ្ទុះមីនខាងលើពីមុនមកគឺមិនដែលបានភ្ជួរនោះទេ។

ក្រោយកើតហេតុ សមត្ថកិច្ចបានចុះដល់កន្លែងកើតហេតុធ្វើរបាយការណ៍ និងប្រគល់សពឲ្យក្រុមគ្រួសារធ្វើបុណ្យតាមប្រពៃណី៕

អត្ថបទ៖ សៅ សារិទ្ធ