បើករថយន្ដចូលបាញ់ប្រហារប្ដីប្រពន្ធមួយគូដល់ក្នុងផ្ទះ​

បុរសជាជនដៃដល់ម្នាក់បានបើករថយន្ដចូលបាញ់ប្រហារប្ដីប្រពន្ធមួយគូដល់ក្នុងផ្ទះបណ្ដាលឲ្យស្រ្តីជាប្រពន្ធស្លាប់ភ្លាមៗ និងបុរសជាប្ដីរងរបួសធ្ងន់។

ព័ត៌មានបឋមដែលក្រុមការងារទើបទទួលបានមុននេះ ករណីបាញ់ប្រហារនេះបានកើតឡើងកាលពីវេលាម៉ោងប្រមាណ១២ថ្ងៃត្រង់ ថ្ងៃទី១១ ខែឧសភា ឆ្នាំ២០២៣នេះ នៅក្នុងភូមិទន្សោងស្លាប់ ឃុំស្រម៉រ ស្រុកជើងព្រៃ ខេត្តកំពង់ចាម។

សេចក្ដីរាយការណ៍ជំហ៊ានដំបូងបានឲ្យដឹងថា ដើមឡើយគេឃើញជនសង្ស័យម្នាក់ចុះពីរថយន្ដមួយគ្រឿងដើរចូលក្នុងផ្ទះរបស់ជនរងគ្រោះ ក្រោយមកស្រាប់តែលឺសំឡេងស្នូរកាំភ្លើងផ្ទួនៗជាច្រើនគ្រាប់ បង្កឲ្យមានការភ្ញាក់ផ្អើលតែម្ដង។ ដោយឡែកខ្មាន់កាំភ្លើងបានគេចខ្លួនបាត់ក្រោយធ្វើសកម្មភាព។

បច្ចុប្បន្នកម្លាំងនគរបាលមូលដ្ឋាន និងកម្លាំងនគរបាលជំនាញនៃស្នងការដ្ឋាននគរបាលខេត្ដកំពង់ចាម បានចុះមកដល់កន្លែងកើតហេតុដើម្បីធ្វើការស្រាវជ្រាវតាមនីតិវិធី៕

អត្ថបទ៖ សុខុម