អ្នកលក់ដូរគ្រឿងសមុទ្រនៅផ្សារក្ដាម ខេត្តកែប នៅតែបន្តបន្លំភ្នែកជញ្ជីងភ្ញៀវទេសចរ

ស្ត្រីជាអាជីវករលក់ដូរគ្រឿងសមុទ្រនៅផ្សារក្ដាម ខេត្តកែប ត្រូវបានកម្លាំងការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តកែប ធ្វើកិច្ចសន្យាអប់រំណែនាំ ក្រោយរកឃើញពីការបន្លំភ្នែកជញ្ជីងលក់មិនគ្រប់គីឡូជូនភ្ញៀវទេសចរ។

យោងតាមកិច្ចសន្យាចុះថ្ងៃទី២១ ខែឧសភា ឆ្នាំ២០២៣ របស់ការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តកែប ស្ត្រីអាជីរកររូបនេះនឹងត្រូវពិន័យជាប្រាក់ចំនួន២លានរៀល និងដាក់ទោសទាន់តាមផ្លូវច្បាប់បើមិនរៀងចាល។

ស្រ្តីឈ្មោះ នៅ ខ្លឹង មានអាយុ២៨ឆ្នាំ ជាអាជីវករលក់ដូរបង្គារនៅផ្សារក្ដាម ក្នុងក្រុងកែប ខេត្តកែប បានសារភាពនូវកំហស់របស់ខ្លួន និងសូមសមត្ថកិច្ចដាក់ទោសទាន់តាមផ្លូវច្បាប់បើសិនប្រព្រឹត្តិករណីនេះនៅថ្ងៃក្រោយទៀត។

គួររំលឹកថា នេះមិនមែនជាករណីទី១នោះទេ ដែលអាជីវករលក់ដូរមួយចំនួននៅផ្សារក្ដាមខេត្តកែប តែងតែបន្លំភ្នែកជញ្ជីងភ្ញៀវទេសចរ ហើយក៏មានការរិះគន់ជាញឹកញាប់ផងដែរ៕

អត្ថបទ៖ សុខុម