ផ្ទុះមីនពីរគ្រាប់ នៅក្បែព្រំដែនរបួសថៃម្នាក់ និងយោធាកម្ពុជាម្នាក់

សំឡេងផ្ទុះគ្រាប់មីន បានលាន់ឮកងរំពងព្រៃ កាលពីវេលាម៉ោង ១០ និង ៣០ នាទីព្រឹក ថ្ងៃទី២៧ ខែឧសភា ឆ្នាំ២០២៣ នៅត្រង់ចំណុច ចន្លោះបង្គោលព្រំដែនលេខ ៣៩ និង ៣៩ GPS លេខ TA ៦៣១៦១៤២៨៧៩ នៅជាប់ព្រំដែនកម្ពុជា ថៃ ក្នុងឃុំគោកល្មៀត ស្រុកថ្មពួក ខេត្តបន្ទាយមានជ័យ បណ្តាលឱ្យមនុស្សពីរ​នាក់ជនជាតិថៃម្នាក់ និងខ្មែរម្នាក់រងរបួសធ្ងន់ធ្ងរ ក្រោយពីពួកគេ បានដើរលុកលុយចូលព្រៃទឹកដីកម្ពុជា ដើម្បីរករុក្ខជាតិនានា។យោងតាមការផ្សាយរបស់គេហទំព័ររបស់ប្រទេសថៃមួយចំនួនបានបញ្ជាក់ថា នៅមុនពេលកើតហេតុ មានស្ត្រីជនជាតិថៃម្នាក់ឈ្មោះ សំរិទ្ធ រួយរីន អាយុ៤៦ឆ្នាំ រស់នៅក្នុងស្រុកតាប្រាក់យ៉ា ខេត្តស្រះកែវ បានធ្វើដំណើរចូលទៅក្នុងព្រៃ ដើម្បីដើររករុក្ខជាតិនានា ដោយបានចូលមកក្នុងទឹកដីកម្ពុជា​ប្រមាណ២០០ម៉ែត្រ។

ព័ត៌មានបានបន្តថា លុះពេលដើរដល់ចំណុចខាងលើក៏បានជាន់ទៅលើគ្រាប់មីន មិនស្គាល់ម៉ាក បណ្តាលឱ្យដាច់ កជើងឆ្វេងម្ខាង និងរងរបួសពេញផ្ទៃមុខ។ ក្រោយពីទទួលបានសេចក្តីរាយការណ៍ពីកម្លាំងកងរយលេខ ១២០៣ រួចមក កម្លាំងយោធាព្រំដែនលេខ១២ និងកម្លាំងតម្រួតខេត្តស្រះកែវ បានធ្វើការទំនាក់ទំនងមកខាងភាគីកម្ពុជាឱ្យ​ជួយ​អន្តរាគមន៍។

 នៅពេលនោះដែរកម្លាំងយោធាកម្ពុជា ក៏បានធ្វើដំណើរចូលទៅយកស្ត្រីរងគ្រោះដែលជាជនជាតិថៃ ចេញពីក្នុងព្រៃ ក៏បានជាន់មីនផ្ទុះឡើង១គ្រាប់ទៀត បណ្តាលឱ្យមន្ត្រីយោធាកម្ពុជាម្នាក់រងរបួសពេញផ្ទៃមុខ ទើបធ្វើការដក​ថយ​ដើម្បីឱ្យក្រុមសុីម៉ាក់ធ្វើការត្រួសត្រាយផ្លូវជាមុនសិន។ ភាគីកម្ពុជា ដែលរងគ្រោះមានឈ្មោះ សេង ឆន អាយុ៤៩ឆ្នាំ ត្រូវបានបញ្ជូនទៅសង្គ្រោះបឋមនៅក្នុងមន្ទីរពេទ្យស្រុកថ្មពួក ក្រោយមកក៏បានបញ្ជូនទៅកាន់មន្ទីរ​ពេទ្យស្រុកមង្គល​បូរីវិញហើយ។

ដោយឡែក រហូតដល់វេលាម៉ោង ១ និង ៤៥ នាទីរសៀល ទើបសមត្ថកិច្ចយកស្ត្រីថៃចេញពីព្រៃបាន ដោយបានបញ្ជូន​ទៅកាន់មន្ទីរពេទ្យស្រុកអារញ្ញប្រាថេត ដើម្បីកាត់ជើង និងព្យាបាល ៕

អត្ថបទ ÷ សោ និយមរ័ត្ន