សមាគមធនាគារនៅកម្ពុជា ជូនដំណឹងអំពីសារក្លែងបន្លំតាមប្រព័ន្ធទូរស័ព្ទ (SMS Scam)

សមាគមធនាគារនៅកម្ពុជា កាលពីថ្ងៃទី៥​ ខែមិថុនា ម្សិលមិញនេះ បានចេញសេចក្ដីជូនដំណឹងមួយស្ដីពីសារក្លែងបន្លំតាមប្រព័ន្ធទូរស័ព្ទ (SMS Scam) ជាមួយនឹងតំណភ្ជាប់បោកបញ្ឆោត (Fraudulent Link) ដើម្បីទទួលបានព័ត៌មានសម្ងាត់របស់អ្នកប្រើប្រាស់។

យោងតាមសេចក្ដីជូនដំណឹងរបស់សមាគមធនាគារនៅកម្ពុជា ដែលក្រុមការងារទើបទទួលបាននៅព្រឹកថ្ងៃទី៦ ខែមិថុនា នេះបានឲ្យដឹងថា ដោយសារចំនួនសារក្លែង​បន្លំតាមប្រព័ន្ធទូរស័ព្ទ (SMS Phishing) ឬតាមបច្ចេកវិទ្យាអ៊ិនធើណិត មានការរីករាលដាល និងមានភាពស្មុគស្មាញ សូមលោកអ្នកមានការប្រុងប្រយ័ត្នខ្ពស់នូវព័ត៌មានផ្ទាល់ខ្លួន។

សមាគមធនាគារនៅកម្ពុជា បញ្ជាក់ថា ប្រសិនបើលោកអ្នកទទួលបានតំណភ្ជាប់ដែលមានការសង្ស័យសូមកុំចុចបើក ឬបំពេញព័​ត៌​មានរបស់លោកអ្នករួមមាន៖ លេខទូរសព្ទ, លេខគណនី, លេខ PIN, លេខកូដសម្ងាត់ ទិន្នន័យផ្ទាល់ខ្លួន។ ក្នុងករណីលោក​អ្នក​បានចុចបើក ឬបំពេញលើតំណភ្ជាប់ដែលមានការសង្ស័យទាំងអស់នោះហើយ សូមធ្វើការទាក់ទងទៅកាន់ធនាគារ​ដែលលោក​អ្នកប្រើប្រាស់សេវាជាបន្ទាន់តាមរយៈលេខទំនាក់ទំនង (Hotline) ឬលេខទំនាក់ទំនងអតិថិជន (Toll-Free)របស់គ្រឹះស្ថាន។

បើតាមសេចក្ដីជូនដំណឹងរបស់សមាគមធនាគារនៅកម្ពុជា ជនបន្លំបោកប្រាស់អាចចូលទៅបញ្ជាក្នុងកម្មវិធីទូរសព្ទដៃ ឬប្រតិបត្តិការ​ធនាគារតាមអ៊ីនធើណិត (Internet Banking) របស់លោកអ្នកបាន ប្រសិនបើលោកអ្នកមិនបានការពារ​លេខ PIN ឬលេខកូដ​សម្ងាត់របស់លោកអ្នកឱ្យបានល្អទេនោះ ទោះបីជាលោកអ្នកមានវិធានសន្តិសុខរឹងមាំក្នុងការការ​ពារ​យ៉ាងណាក៏ដោយ៕

អត្ថបទ៖ សុខុម