ឃាត់ខ្លួនស្រ្តីជនជាតិចិនម្នាក់ដកហូតថ្នាំញៀន និងសារធាតុផ្សំជាង១០០គីឡូ

កម្លាំងជំនាញនៃមន្ទីរប្រឆាំងគ្រឿងញៀន (ក១០) អគ្គស្នងការនគរបាលជាតិ បានស្រាវជ្រាវបង្ក្រាបឃាត់ខ្លួនស្រ្តីជនជាតិចិនម្នាក់ដកហូតថ្នាំញៀន និងសារធាតុផ្សំមិនច្បាស់ជាង១០០គីឡូក្រាម។

ប្រតិបត្តិការនេះបានធ្វើឡើងកាលថ្ងៃទី២៧ ខែមិថុនា ឆ្នាំ២០២៣ វេលាម៉ោង០១និង៤០នាទី នៅចំណុចខុនដូរ ដឺភីច (The Peach) បន្ទប់លេខ២៨០១ សង្កាត់ទន្លេបាសាក់ ខណ្ឌចំកាមន រាជធានីភ្នំពេញ។

យោងតាមរបាយការណ៍របស់អគ្គស្នងការដ្ឋាននគរបាលជាតិ បានឲ្យដឹងថា ប្រតិបត្តិការនេះកម្លាំងជំនាញបានឃាត់ខ្លួនស្ត្រីជាជនជាតិចិនម្នាក់មានឈ្មោះ អ៊ូ ហ័រ ជិន (WU HUA ZHEN) ភេទស្រី អាយុ៤៣ឆ្នាំ ជនជាតិចិន និងដកហូតបានវត្ថុតាងថ្នាំញៀនជាង២៣គីឡូក្រាម និងសារធាតុផ្សំមិនច្បាស់ជាង១០០គីឡូក្រាម។

ជនសង្ស័យ និងវត្ថុតាងត្រូវបានកសាងសំណុំរឿងបញ្ជូនទៅសាលាដំបូងរាជធានីភំ្នពេញដើម្បីចាត់ការតាមនីតិវិធី៕

អត្ថបទ៖​ សុខុម