មនុស្សដល់ទៅ ៨នាក់ បាត់បង់ជីវិតក្នុងអគ្គិភ័យឆេះក្លិបកម្សាន្ត នៅសង្កាត់ផ្សារដេប៉ូទី១

តាមសេចក្តីរាយការណ៍ពីអាជ្ញាធរបានឱ្យដឹងថា គិតត្រឹមម៉ោង ១០ព្រឹក ថ្ងៃទី២ ខែកក្កដា ឆ្នាំ២០២៣នេះ មនុស្ស ៨នាក់បានស្លាប់ (ស្រី៣) ក្នុងករណីអគ្គិភ័យឆេះក្លិបកម្សាន្តមួយកន្លែង ស្ថិតនៅសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។

អគ្គិភ័យឆេះក្លឹបកម្សាន្ដនេះ កើតហេតុតាំងពីម៉ោងជិត ៥ល្ងាច ថ្ងៃទី១ ខែកក្កដា ឆ្នាំ២០២៣។ នៅមុនពេលកើតហេតុ គេបានឃើញ អណ្ដាតភ្លើងឆាបឆេះយ៉ាងខ្មួលខ្មាញ់ពីជាន់ខាងលើ ហើយភ្លាមៗនោះនគរបាលក៏បានចេញរថយន្តទៅអន្តរាគមន៍ភ្លាមៗ។ ប៉ុន្តែពុំអាចទប់ស្កាត់បាន ជាហេតុបណ្តាលឱ្យមនុស្សជាប់គាំងនៅក្នុងនោះអគារ និងបានរកឃើញជនរងគ្រោះបាត់បង់ជីវិតចំនួន ៦នាក់។

សមត្ថកិច្ច និងអាជ្ញាធរមូលដ្ឋាន ក៏ដូចជាខាងសមត្ថកិច្ចជំនាញ មិនទាន់បង្ហាញអំពីអត្តសញ្ញាណជនរងគ្រោះដែលបានបាត់បង់ជីវិតនោះនៅឡើយទេ។

ក្នុងប្រតិបត្តិការណ៍សង្គ្រោះនេះ កម្លាំងសមត្ថកិច្ចបានយករថយន្តពន្លត់អគ្គិភ័យរបស់ ការិយាល័យបង្ការ និងពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ ចំនួន ២២គ្រឿង ប្រេីប្រាស់ទឹកអស់ចំនួន ៨៨ឡាន, រថយន្តទីក្រុងអូឡាំព្យាចំនួន ២គ្រឿង ប្រើប្រាស់ទឹកអស់ចំនួន ៦ឡាន, រថយន្តទីក្រុងជ្រោយចង្វារចំនួន ៥គ្រឿង ប្រើប្រាស់ទឹកអស់ចំនួន ១៥ឡាន និងរថយន្តក្រុមហ៊ុនស្រាបៀរកម្ពុជាចំនួន ១គ្រឿង ប្រើប្រាស់ទឹកអស់ចំនួន ៣ឡាន ទើបអគ្គីភ័យបានរលត់ជាស្ថាពរ ដោយប្រើរយៈពេល ៣ និង៣០នាទី៕

អត្ថបទ៖ សុខា