ឃាត់ខ្លួនយុវជន៥នាក់ ក្រោយព្រួតគប់ និងកាប់យុវជនម្នាក់បណ្ដាលឲ្យស្លាប់

កម្លាំងនគរបាលនៃស្នងការដ្ឋាននគរបាលខេត្តស្វាយរៀង សហការជាមួយកម្លាំងនគរបាលនៃអធិការដ្ឋាននគរបាលស្រុកស្វាយទាប ចុះស្រាវជ្រាវ និងឃាត់ខ្លួនជនសង្ស័យចំនួន៥នាក់ ពាក់ព័ន្ធករណីយកដុំថ្មគប់ និងយកកាំបិតកាប់លើយុវជនម្នាក់បណ្ដាលឲ្យស្លាប់។

ការឃាត់ខ្លួនជនសង្ស័យទាំង៥នាក់នេះ បានធ្វើឡើងកាលពីព្រឹកថ្ងៃទីទី១១ ខែកក្កដា ឆ្នាំ២០២៣ បន្ទាប់ពីកម្លាំងនគរបាលបានទទួលពាក្យបណ្ដឹងពីឱពុកជនរងគ្រោះ។ យោងតាមរបាយការណ៍របស់ស្នងការដ្ឋាននគរបាលខេត្តស្វាយរៀងបានឲ្យដឹងថា បន្ទាប់ពីទទួលបានបណ្តឹងពីឪពុករបស់ជនរងគ្រោះដែលមានទីលំនៅភូមិរវៀង ឃុំគ្រួស ស្រុកស្វាយជ្រំ ថានៅថ្ងៃទី១១ ខែកក្កដា ឆ្នាំ២០២៣ វេលាម៉ោង១២និង៣០នាទី ស្ថិតនៅភូមិប្រសូត្រ១ ឃុំកណ្តៀងរាយ ស្រុកស្វាយទាប កូនរបស់ខ្លួនត្រូវបានក្មេងមួយក្រុមយកដុំថ្មគប់ និងយកកាំបិតកាប់កូនរបស់ខ្លួនបណ្តាលអោយស្លាប់នៅពេលបញ្ជូនដល់មន្ទីរពេទ្យខេត្តស្វាយរៀង។

បន្ទាប់ទទួលបានពាក្យបណ្ដឹង លោកឧត្តមសេនីយ៍ត្រី កុយ សុភាព ស្នងការរងទទួលផែនការងារនគរបាលព្រហ្មទណ្ឌ ចុះសហការជាមួយកម្លាំងអធិការដ្ឋាននគរបាលស្រុកស្វាយទាប ធ្វើការស្រាវជ្រាវរហូតឃាត់ខ្លួនជនសង្ស័យបានចំនួន​៥នាក់ (ប្រុស) ព្រមទាំងបានដកហូត កាំបិត២ដើម និងដាវ២ដើម។

ជនសង្ស័យទាំង៥នាក់ រួមទាំងវត្ថុតាង កំពុងត្រូវបានកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់៕

អត្ថបទ៖​ សុខុម