អង្គរក្សឯកជន ៤នាក់ ព្រមទទួលកំហុស និងសុំទោសជាសាធារណៈ ក្រោយប៉ះទង្គិចពាក្យសម្ដីជាមួយអ្នកធ្វើដំណើរម្នាក់

បុរសជាអង្គរក្សឯកជន ៤នាក់ ដែលបានប៉ះទង្គិចពាក្យសម្ដី និងកាយវិការជាមួយបុរសជាអ្នកធ្វើដំណើរ​ម្នាក់ កាលពីថ្ងៃទី ១២ ខែកក្កដានោះ ត្រូវបានសមត្ថកិច្ចរាជធានីភ្នំពេញ បានកោះឲ្យចូលខ្លួនមកបំភ្លឺ និងសុំទោសជាសាធារណៈ។ ពួកគេទាំង ៤នាក់នោះ បានឆ្លើយសារភាពទទួលកំហុស ហើយក៏បានសុំទោសជាសាធារណៈ ផងដែរ។

លោកឧត្ដមសេនីយ៍ត្រី សាន សុខសីហា អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ​ បានឲ្យដឹងថា កាលពីព្រឹកថ្ងៃទី ១៣ ខែកក្កដា ឆ្នាំ ២០២៣ កម្លាំងនគរបាលនៃស្នងការដ្ឋាននគរបាលរាជធានីភ្នំពេញទទួលផែនការងារសន្តិសុខ បានកោះហៅបុរសជាអង្គរក្សឯកជន ៤នាក់ ដែលបានប៉ះទង្គិចពាក្យសម្ដី និងកាយវិការជាមួយបុរសជាអ្នកធ្វើដំណើរម្នាក់ ដើម្បីឲ្យចូលខ្លួនមកបំភ្លឺ និងសុំទោសជាសាធារណៈ។

លោកឧត្ដមសេនីយ៍ត្រី សាន សុខសីហា បានបន្តថា «សមត្ថកិច្ចនៃស្នងការដ្ឋាននគរបាលរាជធានីភ្នំពេញ បានធ្វើការសួរនាំ ហើយជនទាំង ៤នាក់នោះ ក៏បានឆ្លើយសារភាពទទួលកំហុស ហើយក៏បានធ្វើការសុំទោសជាសាធារណៈផងដែរ»។

អ្នកនាំពាក្យ នៃស្នងការដ្ឋាននគរបាលរាជធានីភ្នំពេញ បានបញ្ជាក់ទៀតថា ក្រុមអង្គរក្សឯកជនទាំង ៤នាក់នោះ ក៏មានបំណងជួបបុរសដែលខ្លួនប៉ះទង្គិចពាក្យសម្ដីនោះដែរ ដើម្បីសុំទោសដោយផ្ទាល់ផងដែរ។

កាលពីថ្ងៃទី ១២ ខែកក្កដា ឆ្នាំ ២០២៣ម្សិលមិញ មានការរិះគន់នៅលើបណ្ដាញសង្គមហ្វេសប៊ុក ចំពោះបុរសជាអង្គរក្សទាំង ៤នាក់ ដែលជិះម៉ូតូតាមពីក្រោយរថយន្តទំនើបមួយគ្រឿង ដើម្បីការពារចៅហ្វាយនាយរបស់ខ្លួន ដោយចេញពីបឹងកេងកងឆ្ពោះទៅផ្លូវ ៦០ម៉ែត្រ។

លុះមកដល់ចំណុចឡឥដ្ឋនៃផ្លូវជាតិ ២ ដោយសារចរាចរណ៍ចង្អៀត ក៏មានម៉ូតូមួយគ្រឿងជិះដោយបុរសម្នាក់មកជិតក្បែរម៉ូតូរបស់ពួកគេ ហើយក៏ប៉ះឈ្នាន់ម៉ូតូគ្នា។ ពេលនោះពួកគេ ក៏លើកដៃរាងឃាំង មិនឲ្យបុរសរូបនោះទៅមុខបន្ត ហើយបន្ទាប់មកក៏មានការប៉ះទង្គិចពាក្យសម្តីគ្នាទៅវិញទៅមក និងមានកាយវិការមិនសមរម្យផងដែរ។

ក្រុមអង្គរក្សឯកជនទាំង ៤នាក់នោះ បានសន្យាថា មិនប្រព្រឹត្តកំហុសខុសឆ្គងដូចករណីនេះទៀតឡើយ ហើ​យប្រសិនបើពួកគេរំលោភបំពានទៅលើសិទ្ធិអ្នកដទៃរឿងបញ្ហាចរាចរណ៍តាមដងផ្លូវទៀត ពួកគេនឹងទទួលខុសត្រូវតាមច្បាប់៕