ផ្ទុះមីនតោនកណ្តាលផ្លូវកំពុងស្ថាបនាថ្មីនៅបន្ទាយមានជ័យ

មនុស្សពីរនាក់ម្នាក់ជាអ្នកបើករ៉ូឡូកិនថ្នល់ និងម្នាក់ទៀតជាសមាជិកភូមិរងរបួសធ្ងន់ស្រាលក្នុងហេតុការណ៍ផ្ទុះមីនតោននៅកណ្តាលផ្លូវលំដែលកំពុងស្ថាបនាថ្មីស្ថិតក្នុងភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

ហេតុការណ៍នេះបានកើតឡើងកាលពីថ្ងៃទី ១៤ កក្តដា ២០២៣ វេលាម៉ោង ៤៖៣០ នាទីល្ងាចនៅត្រង់ចំណុច​លើ​គម្រោង​ជួសជុលផ្លូវក្រាលគ្រួសមូលនិធិឃុំ ស្ឃុំអូរបីជាន់ ស្រុកអូរជ្រៅ បណ្តាលឱ្យរងរបួសធ្ងន់អ្នកបើករ៉ូឡូ ដោយពេលផ្ទុះបែកកញ្ចក់រ៉ូឡូចំក្បាល់ និងសមាជិកភូមិរបួសស្រាលព្រមទាំងខូចរ៉ូឡូ ៣០%។

ក្រោយហេតុការផ្ទុះភ្លាមៗអាជ្ញាធរ និងសមត្ថកិច្ចមូលបានសង្រ្គោះជនរងគ្រោះដោយរថយន្តសង្រ្គោះរបស់មណ្ឌលសុខភាពឃុំអូរបីជាន់ទៅមន្ទីរពេទ្យមិត្តភាពកម្ពុជាជប៉ុនស្រុកមង្គលបូរី។

តាមការសន្និដ្ឋានជាបឋមគ្រាប់មីនតោនដែលផ្ទុះគឺសល់ពីសម័យសង្រ្គាមព្រោះតំបន់ដែលផ្ទុះអតីតជាតំបន់សមរភូមិប្រយុទ្ធខ្លាំង៕

អត្ថបទ៖ អពៅ