ស្នងការរាជធានីបំភ្លឺក្រោយមានការចុះផ្សាយថាមានករណីដេញប្លន់ដល់ក្នុងបូរី ក្រោយផ្សារព្រែកឯង

ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី១៧ ខែកក្កដា នេះបានចេញសេចក្ដីស្រាយបំភ្លឺមួយបន្ទាប់ពីមានការចុះផ្សាយរបស់គណនី​ហ្វេសប៊ុកឈ្មោះ Mey Mey Kim ថា មានករណីដេញប្លន់ដល់ក្នុងបូរី ក្រោយផ្សារព្រែកឯង ដែលករណីនេះ គឺជាការចុះផ្សាយព័ត៌មានមិនពិត។

បើតាមលោកឧត្ដមសេនីយ៍ទោ សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ការចុះផ្សាយវីដេអូនៅលើបណ្ដាញសង្គមរបស់គណនី​ហ្វេសប៊ុកឈ្មោះ Mey Mey Kim ថាមានករណីដេញប្លន់ដល់ក្នុងបូរី ក្រោយផ្សារព្រែកឯង កាលពីយប់ថ្ងៃសុក្រ ទី៧ ខែកក្កដា ឆ្នាំ២០២៣ វេលាម៉ោង១១និង២០យប់ ជាការចុះផ្សាយព័ត៌មានមិនពិត ជាក់ស្តែងស្ត្រីខាងលើជាប់ពាក់ព័ន្ធ​នឹងករណីពាក្យបណ្តឹងអំពើលួច (ប្រាក់) ដែលចេញដោយព្រះរាជអាជ្ញានៃអយ្យការអមសាលាដំបូងខេត្តកណ្តាល។

អ្នកនាំពាក្យនៃស្នងការដ្ឋានរាជធានីភ្នំពេញ បញ្ជាក់ថា ស្ត្រីរូបនោះបានរត់គេចខ្លួនដោយមិនបានចូលខ្លួនតាមដីការបញ្ជាឲ្យចូលខ្លួនរបស់ព្រះរាជអាជ្ញាអមសាលាដំបូងខេត្តកណ្តាលរហូតមក។

សូមបញ្ជាក់ថា កាលពីថ្ងៃទី១៦ ខែកក្កដា គណនី​ហ្វេសប៊ុកឈ្មោះ Mey Mey Kim បានសេរសេរសារបង្ហោះចែក​ចាយ​នៅលើបណ្ដាញសង្គម និងភ្ជាប់ជាមួយរូបភាពវីដេអូ ដែលស្ត្រីរូបនេះបានលើកឡើងថា មានក្រុមចោរមួយក្រុមមានឡានពីរគ្រឿង ម៉ូតូបីគ្រឿង និងមានអាវុធក្នុងដៃស្ទាក់រថយន្ដរបស់ខ្លួន។

ខាងក្រោមនេះជាក្លឹមសារទាំងស្រុងរបស់ម្ចាស់គណនី​ហ្វេសប៊ុកឈ្មោះ Mey Mey Kim ៖

សូមពុកម៉ែបងប្អូនចំណាយពេលមើលវីដេអូនេះរហូតដល់ចប់ នេះជាហេតុការដែលខ្ញុំជួបផ្ទាល់នៅថ្ងៃសុក្រទី7វេលាម៉ោង11:30យប់ បន្ទាប់ពីនាងខ្ញុំ និងម្តាយចេញពីហាងហូបស៊ុបមួយកន្លែងត្រឡប់មកផ្ទះវិញស្រាប់តែមានក្រុមចោរមួយក្រុមមានឡានពីរគ្រឿងម៉ូតូបីគ្រឿងនិងមានអាវុធក្នុងដៃ.ហេីយមានឡានមួយគ្រឿងនោះទំនងជាឡានរបស់អង្គភាពក្នុងក្របខណ័្ឌណាមួយដែលមានសារ៉ែននៅពីលេី.ក្រុមចោរដែលមានគ្នាជាក្រុមធ្វេីសកម្មភាពយ៉ាងសាហាវឃោឃៅស្ទាក់ខ្ញុំពីមាត់ផ្លូវចូលផ្ទះរហូតដល់ក្នុងបុរីដែលមានសន្តិសុខនៅយាមពីមុខតែឃាត់វាមិនបានរហូតចូលក្នុងបុរីដែលមានផ្ទះប្រជាជនរស់នៅជុំវិញ.ដោយមូលហេតុពេលនោះសន្តិសុខបុរីមិនអាចឃាត់និងជួយដល់ខ្ញុំបានខ្ញុំក៍សំរេចចិត្តជិះចេញពីបុរីដេីម្បីទៅផ្ទះបងប្អូននៅម្តុំបឹងត្របែកអោយជួយតែពួកវានៅតែព្យាយាមជិះតាមពីក្រោយរហូតនាងខ្ញុំជាន់ឡានសឹងតែឆេះម៉ាសុីនទំរាំដល់ផ្ទះបងប្អូននិងមានប្រជាពលរដ្ថរស់នៅកុះករច្រេីនទេីបមានសុវត្តិភាព.នេះជាវីដេអូនៅតាមដងផ្លូវជុំវិញបុរី.រាល់វីដេអូរូបភាពនិងផ្លាកលេខឡានក្រុមចោរដែលធ្វេីសកម្មភាពនៅយប់នោះខ្ញុំថតបានទាំងអស់.

ខ្ញុំសូមអំពាវនាវដល់បងៗសម្ថកិច្ចនិងថ្នាក់ដឹកនាំសូមជួយពង្រឹងនិងវែកមុខរកពួកក្រុមចោរប្លន់ដ៍សាហាវឃោឃៅទាំងនេះផងដេីម្បីសុវត្តិភាពក្នុងការរស់នៅរបស់ប្រជាពលរដ្ធ. ហេតុការណ៍នេះកេីតនៅបុរី the wood ក្រោយផ្សាព្រែកអែង៕

អត្ថបទ៖ សុខុម