ពលរដ្ឋនៅចម្ការលោក ខឹម វាសនា សល់តែប្រមាណ​ជាង១០០នាក់ប៉ុណ្ណោះ

គិតត្រឹមថ្ងៃទី២០ ខែកក្កដា ឆ្នាំ២០២៣នេះ ពលរដ្ឋដែលរស់នៅចំការលោក ខឹម វាសនា នៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប មានចំនួនប្រមាណជាង១០០នាក់ប៉ុណ្ណោះ ដែលពួកគាត់ទាំងនោះ គឺនៅជួយមើលថែចម្ការខ្លះទៀតឃ្វាលគោ ចិញ្ចឹមជ្រូកជាដើម។

ចំពោះពលរដ្ឋដែលរស់នៅក្នុងចំការនោះអ្នកខ្លះមានជំងឺ ប៉ុន្តែត្រូវបានក្រុមគ្រូពេទ្យជួយព្យាបាលជាសះស្បើយឡើងវិញផងដែរ។ រីឯកម្លាំងនគរបាលក៏កំពុងបន្តយាមកាមជាច្រើននាក់ដើម្បីការពារសុវត្ថិភាពរបស់ពួកគាត់ផងដែរ។ ដោយឡែកមណ្ឌលសុខភាព រុនតាឯក បានបន្តចុះមកពិនិត្យសុខភាពជូនដល់កងកម្លាំងនគរបាលដែលឈរជើងប្រចាំការនៅជុំវិញដីចម្ការម្រេច១២ហិចតា ក្នុងមានដូចជា វាស់ឈាម ចង្វាក់បេះដូង និងផ្លូវដង្ហើម និងចែកថ្នាំវីតាមីន ជូនដល់កងកម្លាំង។

លទ្ធផលទទួលបានកម្លាំងដែលមកប្រចាំការទាំង១១ស្រុកឃើញថា មានសុខភាពល្អ និងមានកម្លាំងចាស់ៗមានលើស​ឈាម និងលើសជាតិស្ករ និងមានលំហាត់ប្រាណជារៀងរាល់ថ្ងៃផងដែរ៕

អត្ថបទ៖ កុសល