ពលរដ្ឋនៅតែភ័យខ្លាចគ្រាប់អាវុធយុទ្ធភណ្ឌមិនទាន់ផ្ទុះដែលនៅសេសសល់ពីសង្គ្រាម

ប្រជាពលរដ្ឋបានប្រទះឃើញគ្រាប់អាវុធយុទ្ធភណ្ឌមិនទាន់ផ្ទុះនៅមាត់ច្រាំងទន្លេចំណុចអូរខ្លុង ក្នុងភូមិតាដុងតាដាំ  សង្កាត់ស្រះឬស្សី ក្រុងស្ទឹងត្រែង ហើយពួកគាត់សំណូមពរឱ្យក្រុមប្រតិបត្តិករកម្ចាត់មីនមកយកទៅទុកដាក់ ដើម្បីបញ្ចៀសការគ្រោះថ្នាក់ដោយដោយយថាហេតុ។

លោក សិរី វុត្ថា ប្រជាពលរដ្ឋរស់នៅចំណុចអូរខ្លុង សង្កាត់ស្រះឬស្សី ក្រុងស្ទឹងត្រែងស្នើសុំឱ្យមន្ត្រីក្រុមប្រតិបត្តិករកម្ចាត់មីន ឬក្រុមមជ្ឈមណ្ឌលបោសសម្អាតមីន និងអាជ្ញាធរមូលដ្ឋានមកជួយយកគ្រាប់នេះទៅកម្ទេចចោល និងជួយធ្វើសកម្មភាពរាវរកយកគ្រាប់ និងកាកសំណល់ផ្សេងៗទៀតចេញពីផ្ទៃនៅភូមិសាស្ត្រនេះផង និងដើម្បីសុវត្ថិភាពក្នុងការដាំដុះដំណាំផ្សេងៗ។

លោកថាក្មេងមកឃ្វាលគោក្របីបានប្រទះឃើញគ្រាប់នេះ ចេះតែលើកបោះលេង ដែលអាចបង្កឱ្យមានការគ្រោះថ្នាក់  ព្រោះគ្រាប់នេះនៅសេសសល់ពីសម័យសង្គ្រាមនៅមិនទាន់ផ្ទុះនៅឡើយទេធ្វើឱ្យមានការភ័យខ្លាចជារៀងរាល់ថ្ងៃ។

លោក សាយ កុសល អភិបាលក្រុងស្ទឹងត្រែងបានបញ្ជាក់ថា៖ លោកទទួលបានដំណឹងពីគ្រាប់ដែលប្រជាពលរដ្ឋប្រទះឃើញនេះហើយ។

លោកថា ករណីនេះលោកបានណែនាំឱ្យមន្ត្រីនគរបាលក្រុងទៅបោះបង្គោលយកខ្សែហ៊ុមព័ទ្ធចៀសវាងមនុស្ស ឬសត្វចូលជិត និងការពារកុំឱ្យមានភ្លើងផ្សែងឆាបឆេះអាចបង្កគ្រោះថ្នាក់។

លោកបន្តថា៖ ដំណឹងនេះក្រុមប្រតិបត្តិករកំចាត់មីន និងមកយកគ្រាប់នេះទៅកំទេចចោល ដើម្បីកុំឱ្យប្រជាពលរដ្ឋយើងមានការភ័យខ្លាច ហើយប្រសិនបើបងប្អូនបានជួបប្រទះឃើញផ្សេងៗទៀត ត្រូវឆាប់រាយការណ៍ជូនអាជ្ញាធរមូលដ្ឋានដែលនៅជិតបំផុត។

សូមបញ្ចាក់ថា៖ មន្ត្រីមជ្ឈមណ្ឌលបោសសម្អាតមីនហាមប្រជាពលរដ្ឋយើងប៉ះពាល់ ព្រោះនេះជាគ្រាប់ប្រឆាំងមនុស្ស ប្រភេទ ១០៦មីលីម៉ែត្រ មូដែល M.346 មានការផ្ទុះកំរិតខ្ពស់ ដែលគាប់ដីនៅសេសសល់ពីសម័យសង្គ្រាម ក្នុងចន្លោះឆ្នាំ១៩៧៣ទៅ១៩៧៥ ហើយប្រសិនបើយើងវាយដំ ឬដុត វាអាចផ្ទុះ៕

អត្ថបទ៖ ងិនលីម