នគរបាល​ជួយ​សង្គ្រោះជនជាតិចិនពីរនាក់ឲ្យរួចផុតពីជិវត ខណៈព្យាយាម​បើក​រថយន្ដឆ្លងកាត់ទឹកកំពុងហូរលើផ្លូវជាតិលេខ៤

កម្លាំងនគរបាលនៃស្នងការដ្ឋាននគរបាលខេត្តកំពង់ស្ពឺបានអន្តរាគមន៍ជួយសង្គ្រោះរថយន្ត ​និងបុរសជនជា​​តិ​​ចិន​២នាក់ដែលព្យាយាមបើករថយន្ដឆ្លងកាត់ទឹ​កកំពុងហូរ​ចំណុចស្ពាន​អូរគគី​ ផ្លូវជាតិលេ​ខ​៤​ រួចពីគ្រោះ​ថ្នាក់។

ស្នងការនគរបាលខេត្តកំពង់ស្ពឺ បានឲ្យដឹងថា នៅព្រឹកថ្ងៃទី៣០ ខែកក្កដា ឆ្នាំ២០២៣នេះ ទឹកនៅតែបន្តធ្លាក់​ពីលើភ្នំដោយសារទឹកភ្លៀង​ បាននឹងកំពុងហូរកាត់​លើផ្លូវជាតិលេខ៤ ​ចំណុចស្ពាន​អូរគគី​ គីឡូម៉ែត្រ​១០៧-១០៨។

សូមបញ្ជាក់ថា កាលពីថ្ងៃទី២៩ ខែកក្កដា ម្សិលមិញនេះ​ រដ្ឋបាលខេត្តកំពង់ស្ពឺ បានចេញសេចក្ដីជូនដំណឺងដល់សាធារ​ណៈជនទាំងអស់ដែលមានបំណងប្រើប្រាស់ផ្លូវជាតិលេខ៤ ឲ្យរកផ្លូវវៀងបណ្ដោះអាសន្នសិន ( អាចប្រើប្រាស់ផ្លូវល្បឿន​លឿន) ដោយសារជំនន់ទឹកភ្លៀងបានលិចផ្លូវជាតិលេខ៤ ត្រង់ចន្លោះគីឡូម៉ែត្រលេខ១០៧-១០៨ ( កម្ពស់30cm ) ហើយភ្លៀងនៅតែបន្តធ្លាក់៕

អត្ថបទ៖​ សុខុម