ប្រកាសផ្អាកការធ្វើដំណើរចរាចរណ៍តាមផ្លូវជាតិលេខ ៤ ជាបណ្ដោះអាសន្ន

មន្ទីរសាធារណការ និងដឹកជញ្ជូនខេត្តព្រះសីហនុ នៅថ្ងៃទី ៣០ ខែកក្កដា ឆ្នាំ ២០២៣នេះ បានប្រកាសផ្អាកចរាចរណ៍ជាបណ្តោះអាសន្នផ្លូវជាតិលេខ ៤ ដើម្បីធានាដល់សុវត្ថិភាពក្នុងការធ្វើដំណើរ។

មន្ទីរសារធារណការ និងដឹកជញ្ជូនខេត្តព្រះសីហនុបានឱ្យដឹងថា រយៈពេល ២-៣ ថ្ងៃកន្លងមកមានភ្លៀងធ្លាក់ច្រើនជាបន្តបន្ទាប់បានធ្វើឱ្យមានការជន់លិចផ្លូវជាតិលេខ៤ ត្រង់ស្ពានស្ទឹងសំរោង ចន្លោះគីឡូម៉ែត្រលេខ១១៥ ដល់គីឡូម៉ែត្រលេខ១១៦ និងត្រង់ស្ពានអូរគគីរ ចន្លោះគីឡូម៉ែត្រលេខ១០៦ ដល់គីឡូម៉ែត្រលេខ១០៨ ដូចនេះមន្ទីរសាធារណការ និងដឹកជញ្ជូនខេត្តព្រះសីហនុ សូមធ្វើការផ្អាកជាបណ្តោះអាសន្ន ចាប់ពីថ្ងៃជូនដំណឹងនេះទៅ រហូតមានការជូនដំណឹងសារជាថ្មី។

មន្ទីរសាធារណការ និងដឹកជញ្ជូនខេត្តព្រះសីហនុ បញ្ជាក់ថា ដើម្បីធានាដល់សុវត្ថិភាពក្នុងការធ្វើដំណើរក្រសួងស្នើសាធារណជន និងបងប្អូនប្រជាពលរដ្ឋ សូមរកផ្លូវវៀងជាបណ្តោះអាសន្នសិន ឬអាចប្រើប្រាស់ផ្លូវល្បឿនលឿន៕