​ជំនន់ទឹកភ្លៀងប៉ះពាល់ដំណាំស្រូវពលរដ្ឋមួយចំនួននៅស្ទឹងស្លាគូ

ដំណាំស្រូវរបស់ប្រជាពលរដ្ឋមួយចំនួននៅប្របដងស្ទឹងស្លាគូរងការប៉ះពាល់ដោយសារជំនន់ទឹកភ្លៀងធ្លាក់ពីខេត្តកំពង់ស្ពឺនារយៈពេលប៉ុន្មានថ្ងៃកន្លងមកនេះ។

​លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រ​សាសន៍ឱ្យដឹងនៅថ្ងៃទី ១ ខែសីហានេះថា ​​លោកមិនទាន់មានទិន្នន័យពីការប៉ះពាល់ដោយសារជំនន់​ទឹកភ្លៀងនៅអមដង​ស្ទឹងស្លាគូនៅឡើយទេ ប៉ុន្តែលោកថា ស្ថានភាពទឹកមិនប៉ះពាល់ធ្ងន់ធ្ងរទេ ហើយទឹកនឹង​ស្រក​ទៅ​វិញដោយសារស្ទឹងស្លាគូមានផ្លូវរំដោះទឹក។

​លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមបានឱ្យដឹងដែរថា ទឹកជំនន់​នៅកំពង់ស្ពឺ បានធ្លាក់ទៅតាមស្ទឹងស្លាគូ នៅក្នុងភូមិនសាស្ត្រខេត្តតាកែវធ្វើឱ្យប៉ះ​ពាល់ដំណាំ​កសិផលខ្លះ ប៉ុន្តែស្ថានភាពនេះ បានធូរស្រាលទៅវិញហើយ បន្ទាប់ពីប៉ះពាល់រយៈពេល ២៤ ទៅ ៤៨ ម៉ោង។

ជំនន់ទឹកភ្លៀងរយៈពេលប៉ុន្មានថ្ងៃនេះបានកើតឡើងនៅខេត្តចំនួន៥ រួមមាន ខេត្តព្រះសីហនុ កំពង់ស្ពឺ កែប កំពត និងកោះកុង បណ្តាលឱ្យប៉ះពាល់ដល់ប្រជាពលរដ្ឋជិត ៥ ពាន់គ្រួសារ ស្លាប់មនុស្សម្នាក់ បាត់ខ្លួនម្នាក់ និងប៉ះពាល់ផលដំណាំ ព្រមទាំងហេដ្ឋារចនាសម្ព័ន្ធចំនួន។

ខេត្តកំពង់ស្ពឺ ប៉ះពាល់ស្រុកភ្នំស្រួច និងស្រុកបរសេដ្ឋ បណ្តាលឱ្យប៉ះពាល់ដល់ផ្ទះប្រជាពលរដ្ឋចំនួន ៣៤៩ ខ្នង ជម្លៀសប្រជាពលរដ្ឋ ១២៣ គ្រួសារ ប៉ះពាល់ដំណាំស្រូវ ៧០៧ ហិកតា ដំណាំរួមផ្សំ ១០៨ ហិកតា ផ្លូវប្រវែង ២ ៩៥០ ម៉ែត្រ ក្នុងនោះដាច់ផ្លូវ ១ ៤៥៥ ម៉ែត្រ ច្រោះខ្នងទំបន់ ៦ កន្លែង ដាច់ទំនប់ ៥០ ម៉ែត្រ និងច្រោះលូ ៤ កន្លែង៕