ទឹកទន្លេមេគង្គខេត្តកំពង់ចាមហូរចូលព្រែក និងវាលទំនាប ១១ កន្លែង

លោក អ៊ុម វិបុល ប្រធានមន្ទីរធនធានទឹក និងឧតុនិយមខេត្តកំពង់ចាមបានប្រាប់ឱ្យដឹងនៅថ្ងៃទី ០២ ខែសីហា ឆ្នាំ២០២៣នេះថា គិតមកដល់ពេលនេះ ទឹកទន្លេមេគង្គបានហូរចូលតាមបណ្តាព្រែកចំនួន ១១ កន្លែង ហើយ ក្នុងចំណោមព្រែកទាំង ៤១ កន្លែងរបស់ខេត្តកំពង់ចាម។

លោក អ៊ុម វិបុល ក៏បានបញ្ជាក់ឲ្យដឹងដែរថា មកដល់ពេលនេះ ទឹកទន្លេមេគង្គមានកំពស់ ៩.៨៨ ម៉ែត្រ កម្រិតដែលត្រូវប្រកាសអាសន្នសម្រាប់ខេត្តកំពង់ចាមគឺកម្ពស់ ១៥,២០ ម៉ែត្រ។ ហេីយកម្ពស់ទឹកទន្លេឡេីងនៅពេលនេះ បានហូរចូលទៅតាមបណ្តាព្រែក និងវាលទំនាបនោះ មានចំនួន១១កន្លែងហេីយ ក្នុងនោះស្រុកកងមាស ៦ កន្លែង ស្រុកកំពង់សៀម ២កន្លែង និងស្រុកស្ទឹងត្រង់ ចំនួន៣កន្លែង។

បើតាមសេចក្ដីជូនដំណឹង ស្ដីពីស្ថានភាពអាកាសធាតុ របស់ក្រសួងធនធានទឹកឧតុនិយម ចាប់ពីថ្ងៃទី០២ ដល់ថ្ងៃទី០៨ សីហា ឆ្នាំ២០២៣ ព្រះរាជាណាចក្រកម្ពុជា ទទួលឥទ្ធិពលពីប្រព័ន្ធសម្ពាធទាបអូសបន្លាយលើភាគខាងជើងប្រទេសឡាវ និងប្រទេសវៀតណាម គួបផ្សំនឹងខ្យល់មូសុងនិរតីក្នុងកម្រិតមធ្យម។

ដោយឡែកក្នុងមហាសមុទ្រ ប៉ាស៊ីហ្វិក ព្យុះឈ្មោះ ខាណុន កំពុងធ្វើដំណើរឆ្ពោះទៅភាគខាងកើតប្រទេសចិន។ លក្ខណៈទាំងនេះ នឹងធ្វើឲ្យតំបន់ទំនាបកណ្ដាល ខ្ពង់រាប និងតំបន់មាត់សមុទ្រ អាចមានភ្លៀងធ្លាក់ ក្នុងកម្រិតតិច ទៅមធ្យម លាយឡំនឹងផ្គរ រន្ទះ និងខ្យល់កន្រ្តាក់ ផងដែរ៕

អត្ថបទ៖ ឡេក ចាន់ពេជ្រ