អ្នកខេត្តព្រះសីហនុម្នាក់រើសបានដុំថ្មម្យ៉ាងអះអាង​ថា ជាកម្អួតត្រីបាឡែន

បុរសម្នាក់ជាអ្នកលក់ដូរនៅខេត្តព្រះសីហនុ រើសបានដុំថ្មម្យ៉ាងហើយអះអាងថាជាកម្អួតត្រីបាឡែន ហើយត្រូវបានអភិបាលខេត្តណែនាំឲ្យមន្ទីរកសិកម្ម រុក្ខាប្រមាញ់ និងនេសាទខេត្តធ្វើការទំនាក់ទំនង​ និងយកទៅពិសោធន៍។

បើតាមរដ្ឋបាលខេត្តព្រះសីហនុ បានឲ្យដឹងនៅរសៀលថ្ងៃទី៨សីហានេះថា បុរសដែលរើសបានហើយអះអាងថាជាកម្អយតត្រីបាឡែននេះមានឈ្មោះ ឡី ប្រុស អាយុ៣៧ឆ្នាំ មុខរបរលក់ដូរ មានស្រុកកំណើតនៅ ឃុំទឹកថ្លា ស្រុកព្រៃនប់ បច្ចុប្បន្នរស់នៅ(កែងសេតេ) សង្កាត់លេខ៣ ក្រុងព្រះសីហនុ ខេត្តព្រះសីហនុ និងរើសបាននៅចំណុចឆ្នេរជំទាវម៉ៅ-ដើមឈើចាំស្នេហ៍ ស្ថិតនៅភូមិគគីរ ឃុំបិតត្រាង ស្រុកព្រៃនប់ ខេត្តព្រះសីហនុ។

រដ្ឋបាលខេត្តបញ្ជាក់ថា បន្ទាប់ពីទទួលបានព័ត៌មានខាងលើភ្លាម លោក គួច ចំរើន អភិបាលនៃគណៈអភិបាលខេត្ត បានណែនាំទៅមន្ទីរកសិកម្ម រុក្ខាប្រមាញ់ និងនេសាទខេត្ត ឱ្យធ្វើការទំនាក់ទំនង និងចុះដល់ទីតាំងរស់នៅរបស់បុរសខាងលើ ដើម្បីអញ្ជើញសាមីខ្លួនមកខណ្ឌរដ្ឋបាលជលផលដើម្បីធ្វើការសាកសួរ និងត្រួតពិនិត្យដុំដែលគាត់អះអាងថាជាកម្អួតត្រីបាឡែននោះ។ ជាមួយគ្នានេះ មន្ត្រីជំនាញបានកាត់យកសំណាកដើម្បីបញ្ជូនទៅមន្ទីរពិសោធន៍រាជធានីភ្នំពេញ ដើម្បីកំណត់អត្តសញ្ញាណតាមរយៈការធ្វើតេស្ត DNA បញ្ជាក់ការពិត។

ទោះបីយ៉ាងណា លទ្ធផលនៃការធ្វើតេស្តនៅមិនទាន់ដឹងនៅឡើយទេ ដោយរដ្ឋបាលខេត្ត នឹងធ្វើការជូនដំណឹងនៅពេលបន្ទាប់៕