​សំរាមជាង ៦០០ តោន ​ត្រូវបានស្រង់ចេញពីទឹកទន្លេ​

សំរាមសំណល់គ្រប់ប្រភេទចំនួនជាង ៦០០ តោនជាពិសេសសំណល់ប្លាស្ទិកត្រូវ​បានប្រមូលចេញ​ពីទឹកទន្លេ ដើម្បីកែច្នៃប្រើប្រាស់ឡើងវិញ និងសម្អាតបរិស្ថានក្នុងទន្លេ។

​លោក នូ សុវណ្ណ នាយកប្រតិបត្តិអង្គការសម្អាត​ទន្លេសមុទ្របានឱ្យដឹងនៅថ្ងៃទី ១៨ ខែសីហានេះថា រយៈពេលជាង ១ ឆ្នាំ អង្គការសម្អាតទន្លេសមុទ្របានស្រង់សំរាម ប្រមាណ ៦០០ តោន ដើម្បីយកទៅកែច្នៃប្រើប្រាស់​ឡើងវិញ និងយកទៅកម្ទេចបំលែងជាថាមពល និងផេះទាំងអស់ក្លាយជាស៊ីម៉ង់ត៍។ ​

​បច្ចុប្បន្នបេសកម្ម​របស់​អង្គការ​ក្នុងការ​ប្រមូល​សំរាម​ប្លា​ស្ទិ​ក​ពី​ទន្លេ  ប្រើទូកមកពីអាល្លឺម៉ង់មួយគ្រឿង ​និងត្រៀមទទូលទូកមួយគ្រឿងទៀតផលិតក្នុងស្រុកដែលជាជំនួយរបស់ក្រុមហ៊ុនឯកជនក្នុងស្រុក ព្រមទាំងសម្ភារដឹកជញ្ជូនសំរាមក៏កើនឡើងដែរ។

​លោក សុវណ្ណ អះអាងថា ​ទូកដែលប្រមូលសំរាមនាំមកក្រោយនេះ មានប្រសិទ្ធភាពល្អដែលអាច​ប្រើប្រាស់​បានគ្រប់កាលៈទេសៈ និងស្របតាមស្ថានភាពទឹករាក់ និងជ្រៅ។

ប្រធានអង្គការរូបនេះ បញ្ជាក់ថា នៅពេលដេលបានទូកថ្មីនៅខែក្រោយ ក្រុមការងារអង្គការរបស់លោក អាចុះមើលសំរាមបានលឿន ឆ្លើយតបបញ្ហាសំរាមបានលឿន ជួយរាជរដ្ឋាភិបាល នៅពេលដែលគាត់ត្រូវការនៅចំណុចណា។ ឧបមាថានៅមុខព្រះរាជវាំង នៅក្នុងឱកាសបុណ្យអុំទូកខាងមុខនេះ ទូកទាំងពីរអង្គការរបស់លោកនឹងចូលរួមជួយសម្អាតទន្លេ៕