នគរបាលខេត្តព្រះសីហនុ ឃាត់ខ្លួនជនជាតិចិន និងវៀតណាម១៥នាក់ករណីហិង្សា និងកាន់កាប់អាវុធខុសច្បាប់

កម្លាំងនគរបាលការិយាល័យនគរបាលព្រហ្មណ្ឌកម្រិតធ្ងន់នៃស្នងការដ្ឋាននគរបាលខេត្តព្រះសីហនុ បានធ្វើលការឃាត់ខ្លួនជនជាតិចិន និងវៀតណាមសរុប១៥នាក់ បន្ទាប់ពីប្រើអំពើហិង្សាដាក់គ្នាទៅវិញទៅមក ខណៈពីរនាក់ជាប់ពាក់ព័ន្ធករណីកាន់កាប់អាវុធដោយខុសច្បាប់។

ការឃាត់ខ្លួនក្រុមជនជាតិចិន និងវៀតណាមនេះ បានធ្វើឡើងកាលពីវេលាម៉ោង១២និង៣០នាទី រំលងអាធ្រាត្រឈានចូលថ្ងៃទី២៨ ខែសីហា ឆ្នាំ២០២៣ នៅចំណុចអាគារកាស៊ីណូ វ៉ាង ឆាវ ជាប់សាលាបឋមសិក្សាកម្មករ ស្ថិតនៅភូមិ៤ សង្កាត់៤ ក្រុង-ខេត្តព្រះសីហនុ។

បើតាមរបាយការណ៍របស់ស្នងការដ្ឋាននគរបាលខេត្តព្រះសីហនុបានឲ្យដឹងថា ក្រោយពីទទួលបានព័ត៌មានថា មានករណីហិង្សាមួយបានកើតឡើងរវាងជនជាតិវៀតណាម និងជនជាតិចិន ២ក្រុម កម្លាំងបានធ្វើស្រាវជ្រាវឆែកឆេរនៅក្នុងអាគារ កាស៊ីណូខាងលើ ដោយឃាត់ខ្លួនបានចំនួន១៣នាក់ ពាក់ព័ន្ធករណីហិង្សា (វាយគ្នាទៅវិញទៅមក) និងជនសង្ស័យពីរនាក់ផ្សេងទៀតដែលកំពុងស្នាក់នៅក្នុងបន្ទប់លេខ 8515 នៃអាគារកាស៊ីណូ ពាក់ព័ន្ធករណីកាន់កាប់អាវុធដោយខុសច្បាប់។

របាយការណ៍បញ្ជាក់ថា អាវុធដែលកម្លាំងរកឃើញ និងដកហូតនោះម៉ាក K54 ចំនួន១ដើម បង់១ គ្រាប់៤គ្រាប់ និងកាំបិតចំនួន៣ដើម។

ក្រោយពីឆែកឆេ និងឃាត់ខ្លួនក្រុមជនសង្ស័យទាំងនេះ កម្លាំងជំនាញបាននាំខ្លួនជនសង្ស័យទាំង១៥នាក់ រួមទាំងវត្ថុតាងមកស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធី៕