ស្ត្រីជាជនពិការម្នាក់បានស្លាប់ក្នុងគ្រោះអគ្គិភ័យនៅខណ្ឌដង្កោ

ស្ត្រីម្នាក់ជាជនពិការត្រូវបានស្លាប់បាត់បង់ជីវិតក្នុងអណ្ដាតភ្លើង ​ខណៈដែលអគ្គិភ័យឆាបឆេះផ្ទះអស់ទាំងស្រុង។ ហេតុការណ៍គ្រោះអគ្គិភ័យនេះបានកើតឡើងនៅវេលាម៉ោង​១និង៣០នាទីយ​ប់​រំលងអាធ្រាត ឈានចូលថ្ងៃទី៤​ ខែកញ្ញា​ ឆ្នាំ២០២៣ ស្ថិតនៅចំណុចផ្លូវព្រៃស​ ភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ។

តាមរបាយការណ៍របស់ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្នុងប្រតិបត្តិការជួយអន្តរាគមន៍ កម្លាំងសមត្ថកិច្ចជំនាញ បានប្រើប្រាស់រថយន្តពន្លត់អគ្គិភ័យចំនួន០៣គ្រឿង ក្នុងនោះមានរថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន០២គ្រឿង ប្រើប្រាស់ទឹកអស់០២ឡាន ស្មើរនឹង​៨ម៉ែត្រគូ​ប​ និងរថយន្តជំនួយមកពីក្រុមហ៊ុន​ ស្រាបៀរកម្ពុជា​ ចំនួន​០១គ្រឿង​ ប្រើប្រាស់ទឹកអស់០១ឡាន​ ស្មើរនឹង០៦​ម៉ែត្រគូប។

របាយការណ៍បញ្ជាក់ថា ផ្ទះដែលត្រូវអគ្គិភ័យឆាបឆេះនេះ ជាប្រភេទសំណង់​ ថ្មក្រោមឈើលើ ទំហំ​៧ម៉ែត្រ​ គុណ​ ៧ម៉ែត្រ បានឆេះសម្ភារៈក្នុងផ្ទះអស់ទាំងស្រុង​ និងបណ្តាលឲ្យស្ត្រីម្នាក់ដែលជាជនពិការបានស្លាប់នៅក្នុងផ្ទះ។ បើតាមសមត្ថកិច្ចជំនាញ ករណីគ្រោះអគ្គីភ័យនេះកើតឡើងដោយសារឆ្លងចរន្តអគ្គីសនី៕